Folklorys i kulturviesturis interesenti 9. novembrī teik aicynuoti iz Latvīšu folklorys kruotuvis (LFK) izbraukuma seminaru Preiļūs.

Latvīšu folklorys kruotuve ir Latvejā leluokais folklorys vuokšonys, izpietis i uzglobuošonys centrs, kurā atrūnams ap 3 milj. folklorys vīneibu – rūkroksti, zeimiejumi, fotomateriali, skaņu i video īroksti. Tī dokumentej myusu tautys dzeivisveidu, viesturi i volūdu vairuoku godu symtu garumā, ļaun īpazeit dažaidu socialu sluoņu i nūvodu folkloru.

Bez latvīšu folklorys vuokumim LFK atsarūn ari cytu Latvejā dzeivojūšu tautu (lībīšu, krīvu, vuocu, ebreju, igauņu, čyguonu i bolkrīvu) folklorys kolekcejis.

Arhivs garamantas.lv ir bezmoksys vītne, kurā poši lītuotuoji ari var pīsadaleit satura pylnveiduošonā – materialu šifriešonā. Svareiga ir ari sabīdreibys leidzdaleiba personu datu papyldynuošonā – teicieju i pīraksteituoju atpazeišona, preciziešona; fotografejuos radzamūs personu i vītu nūskaidruošona. Arhivs regulari teik papyldynuots ar jaunom kolekcejom.

9. novembrī seminarā garamantas.lv redaktoris Elīna Gailīte i Kristīne Pokratniece īpazeistynuos interesentus ar LFK digitaluo arhiva izmontuošonys īspiejom, kai ari pastuosteis i paruodeis, kaidi Preiļu pusis materiali atrūnami Latvīšu folklorys kruotuvē. Seminars nūtiks 15:00 stuņdēs Preiļu viesturis i lītišķuos muokslys muzejā.