Sovu veikumu – nadaudz satiristiskys ailis par myusim pošim – latgalīšim i nūtikšonom Latgolys kulturā pīduovoj Marija Dzeisla.

***

rudinī dzejnīki palīk troki
kai brīži haremus taisa nu dzejis mīļuotuoju, da i taipat viņ
bibliotekuos paņteņus skaita, astru puški, sadzeiti bārni
dzejnīki sytās ar rogim, zemi kaš, divskani, patskani
nav mīra, nav mīra
a cikom kas – sīva vīna kaš buļbis
zyrgs ir oklys, voga ir škeiba, sokumi nūlyuzuši, sābri dzer
dzejnīki salein iz kolna viersa
dzejnīki kuošūs losuos, dzejnīki dabasūs skrīn
liduos iz soltajom zemem piec snīga
sīva runkuļus raun
dzejnīki lidoj puori i skumeigi dzīd:
Anna Rancāāāāne, Anna Rancāāāāne, Anna Rancāāāāne

***

salyku boņukus div rynduos iz skapa
niu maņ tik daudzi vītys
salyktu trejuos, tik vīna datryuka
sazyn kur kleist

zynuotu, pajimtu
niu tik nav vītys
apriekinu tabuluos nav muna vuorda
skaiti, gods otkon pa tukšū
literaturā nav nominantu
sazyn kur kleist

literatura kartona kasteitē
apsīts ar lyna dīgu, tautyski raksteni
divpadsmit eiro, rūku dorbs
Annele Zeļčūs izauss deči i tierguos iz vīna golda
Breivdobys muzejā

muzejā tev i vīta
pi luoča

sajimti riekini
apkure atslāgta
dzejnīku nav
sazyn kur kleist

***

ka postmodernismam nūpeitu veizis
jis par reizis byutu sovs cylvāks
a tai volkojās dīva napījimts pa vuiceibu gruomotom
meituškom golvys jauc
meituškys savecej, palīk par pasnīdziejom
bruņceiši eiseni, palīk vēļ eisuoki
nu i kas par tū
pasper tū
pi kuojis moralis lykumi, volūdys sokumi
Leikumai napatruopsi
nūliks taisnu linealu, nūviļks streipi – ej!
vot, vysi lykumi, vot, vysi leikumi
paraugi atkuortuot, salikt pa sovam
cylvāks bez izlūksnis, cylvāks bez veižu

***

kotram sokumam pa rokumam
kotrai luopstai pa vuorpai
kotrai svuorpstai pa glyndzynam
ka vyss pasaulī byutu vīnaiž sadaleits
školuotuoja napasādynuotu manis koktā
algebrys lykumi cytā pasaulī, vīnaids ar nulli
paraugi pīdzejuot školys sīnys avīzei
lai literaturys školuotuoja nu kaifa nazyna
i klasisbīdri autora nazyna
pazyna Leonu Brīdi i vēļ nazcik dzejnīku
Marija Andžāne palyka puori
puorī ar Oskaru Seikstu
jam seiksta buorda
labi, ka sleikstu
labi īsagiut
vot vysi puotori
vysim vīnaidi

***

seiki reiti i seiki vokori
seikuos druponuos sasaškeļ seiki
seika tu beji
cikom nanūsleiki
upe kai iudini
upe kai akmini
upe kai zyvu rymbuli
aizleigoj
iudiņa straumēs moti leigoni
akmiņs ar plešu
zivtenis symtim
seikys seicenis
pazib i pazibsnej
aizzib i aizbligznej
poša tī beji

***

kolrabu salatūs patisoni, tvaicāti kabači
topinamburi ar kvinoju, kale kuopustu smuteji
veseleigi itai dzeivuot
itai nikod nav bejs
kod nūmieršu, īsiejit munu siekleņu zemē
iz muna groba lyni zīdēs kai bierneibā – zylim zīdenim
leiguosīs viejā kai jiura, kai bezgaleiba
boltā kraklā ar prīveiti pīstruoduošu
meilajai Muorai par paleigu
izlūceišu, saskaiteišu, padūšu rūceņā
vysu, vysu
vysu tū lobuokū
biologiski audzātū, biologiski pļautū

***

feisbukā manis nabeja
teleponam nūgrīžu skaņu
vacapā nivīnam naraksteju
skaipam beju aizmiersuse paroli
draugi ir vacmūdeigi
tviterī niu vaira nav tys
pinterestā vīnys buobys
da i vyspuor vyss rībās
siežu iz pūda
šaļteņa laimis