Adventa i Zīmyssvātku laikā vairuokuos vītuos Latgolā nūtiks lobdareibys koncerti ar mierki atbaļsteit deveņgadeigū Agnesi Vitani i juos saimi. Koncertūs uzastuos  J. Ivanova Rēzeknis muzykys vydsškolu absolviejuši jaunīši, kurī jau sešus godus Zīmyssvātkūs saīt kūpā i roda nalelu breinumu – aizkustynūšu koncertprogramu. Jūs sirdslīta – muzyka – padora gaišuoku apleicamūs cylvāku dzeivi.

“Kotram sovu sauvi laimis” – ar itū devizi Zīmyssvātku muzykaluo apvīneiba ari itūgod puļcejās kūpā, kab svātkūs vairuotu prīcu i ticeibu gaišajam, itūreiz eipaši deveņgadeigajai Agnesei Vitanei i četrgadeigajai Anastasijai Burovai nu Rēzeknis.

Agnese ir cīši dzeivisprīceiga, smaideiga i pozitiva. Dīvamžāļ Agnesei ir izstuodeita pamatdiagnoze Angelmana sindroms. Tei ir cīši rata genetiska saslimšona, kam rakstureiga gareiguo atpaliceiba, nav volūdys, traucāta seikuo motorika i leidzsvors, slykts mīgs i simptomatiskuo epilepseja. Kūpā mes varam paleidzēt Agnesei koč nadaudz atvīgluot ituos slimeibys radeituos sakys, kab meitine palyktu piec īspiejis patstuoveiguoka, cik nu tys īspiejams, i turpynuotu meiļuot dzeivi tikpat cīši i patīsi kai da šam.

Anastasijis diagnoze ir Antenatāls CNS būjuojums. Sasnādzūt 2,5 godu vacumu, meitine suoce spert pyrmūs sūļus. Kusteibys beja nastabilys i saspryngtys. Itūšaļt Anastasija vys vēļ narunoj, namuok izpiļdeit vīnkuoršus lyugumus, naspiej ilgi koncentrēt viereibu, ir problemys ar komunikaceju. Vysu itū laiku meitine ir veikuse rehabilitacejis, nu bārna atteisteiba vierzejuos iz prīšku cīši lānā tempā. Beidzūt uorsti Sanktpīterburgys neirologejis centrā ir davuši cereibys, ka Anastasija varātu izaveseļuot, nu, lai tys nūtyktu, proceduru kursam vajadzeigi leli finansiali leidzekli.

Koncerti itūgod nūtiks: 11. decembrī 15.00 Lūznovys muižā, 23. decembrī 18.00 Rēzeknis teatra nomā “Joriks” i 22.00 Preiļu tierdznīceibys centrā “Ūga”, kai ari 26. decembrī 18.00 Ludzys tautys nomā.

Karteņa: Anita Austvika (momenti.lv)