Autors: Juoņs Jansons, radio NABA raidejums “Vārnu Laiks”

Latgolys regions vysod ir puorsteidzs ar talantim. Šakur vēļ vīns, jau ar trešū albumu.

Pi smogajim pīmārim par pozitivu pīmāru mynami thrash metal trio “Sacramental”, kas spūži puorstuovēja vaļsti “Wacken Open Air” 2011. godā, īsaryndojūt trešajā vītā grupu konkursā, kas beja gona gryuts. Gon vītejā atlasē, gon storptautiskajā. “Green Novice” – ūtra zynomuokuo pošmuoju folk metal grupa, kas ari izapauž latgalīšu volūdā. Folciskī “Varang Nord” i thrash metal grupa “Saintorment”, “Dabasu Durovys” ari ir nu Latgolys pusis.

“Sovvaļnīks” turpynoj īsuoktū, ratai pasaruoda ar koncertu, otkon pazyud. Prūtams, grupys centralais dziniejs ir gitarists, vokalists, pasnīdziejs LU i Rēzeknis augstškolā – Ingars. Daļai jis asociēsīs ar latgalīšu popmuzykys projektim “Borowa MC”, daļa jū atpazeis piec malnajim okulerim, vysod nūsakuorušu ar vysmoz padsmit pīkarenim koklā. Kuorteigs metalists.

Turpynoj īsuoktū, partū ka alternativuo roka ci metala vierzīnī pyrmī sūli beja ar solo albumu “Sūpluok” (2009), ruodīs vys vēļ napuorspāts lobalbums latgalīšu volūdā, kas apvīnoj melanholiskū rokmuzyku i akustiku, tautisku pīskuorīni.

“Bolts Susātivs” (2010) jau īzeimēja smagniejuoku, grīzeiguoku skaniejumu, reizē nūstyprynojūt grupys vuordu kai pylnasineigu dzeivūs muziķu grupai.

Obejūs mynātajūs i ari jaunajā vysys dzīsmis ir latgalīšu volūdā, izmontojūt asūšu ci jau naasūšu latgalīšu dzejnīku tekstus. Kas labi, partū ka nazynuotuojim paver pavysam jaunys lopys itymā, plašuok mozuok zynomajā kulturā.

Skaniejuma ziņā jaunais albums ir smagniejuoks, nu vuoka leidz vuokam. Izreiz ausīs īkriss, kū klausās pats Ingars, bet kūpejū nūskaņu tys nimoz namaitoj, partū ka koč kur dzierdāts motivs veiksmeigai sapeits ar originalom sovom īspēlem i idejom.

Vīns vīneigs zuodžs? Nikuo nabeja! Melodiskuos, lipeiguos, balādeiguos dzīsmis mejās ar zuodžeišim, bet vyss forši saspālāts. Pats golvonais – ka tys vyss ir tik sasūdeiti sirsneigi – ka tuos ir dusmis, tod tuos tai ari skaņ, ka tuos ir apcereigys skumis, tod tai skaņ, ka gribīs sirdi izraut i aizmest pa gaisu.

Šaubu nav, labi padareits darbeņš. Ar itū albumu, cerams, “Sovvaļnīks” beidzūt byus atrads vierzīni, kurā pīsaturēt, deļtam, ka cytaiž šaudeišonuos nu–iz. Ka paliks iz ituo smagnejuo, bet melodiskuo roka stygys, ar laiku jū atzeis, nūvērtēs i cīneis gon metalisti, gon folkmetalisti, gon ari tī klauseituoji, kas kasdīnā itaidu muzyku nasaklausa.

Pamatsastuovu papyldynuojuši gostu muziki ar vuordu – Kaspars Tobis, Māris Muktupāvels, Biruta Ozoliņa, kas albumā īsver papyldu garšu i dažaideibu.

Nasaprotot, par kū ir dzīšmu teksti? Diska gruomateņā tī ir vydā. Tī, kas naprūt latgalīšu volūdu, var skaiteit tekstus angļu volūdā.

Leluokais puorsteigums “Vaicuojums”, nīka 43 sekundis, bet leidz šam vystrokuokuo Sovvaļnīka dzīsme, kas dzierdāta. I papyldus dzīsmis “Augšanceļūtīs”, “Pi Putynu Gaisā” ruoda zaļū gaismu, ka itys muzikis prūt labi, originali izapaust ari folkmuzykys laukā. Iz nuokušū varātu paraudzeit obejus skaņu Gintus – Stankeviču i Lundbergu – drusku nūmaineit ar kaidu cytu. Obeji, prūtams, sova orūda meistari, bet jūs atpazeistamais skaniejums beja jau īprīkšejā albumā.

Vuoceņa biļde – ka pyrmī diveji albumi uzrunuoja ar vuoceņu, tod itys naizsoka nikuo. Kas tys ir?

Roksta pyrmpubliciejums naba.lv