2016. goda izskaņā Latgolys kulturys programys 2016 projektu konkursa apstyprynuotuo projekta “Grāmatas “Latgales šmakovkas vēsture” izdošana” ītvorūs ar Latgolys regiona atteisteibys agenturys, Vaļsts kulturkapitala fonda, a/s “Latvijas valsts meži” finansialu atbolstu Daugovpiļs piļsātys pošvaļdeibys turisma i informacejis agentura izdavuse Latgolys Šmakovkys viesturis gruomotu, informej Daugovpiļs piļsātys pošvaļdeibys puorstuove Lolita Kozlovska.

Sagataveitajam izdavumam ir zynoma prīškviesture. 2014. godā Latgolys planavuošonys regions sadarbeibā ar Latgolys regiona atteisteibys agenturu, Polockys (Boltkrīveja) apgobola izpyldkomiteju i Utenys (Lītova) nūvodpietnīceibys muzeju Eiropys sābru attīceibu i partnereibys instrumenta Latvejis, Lītovys i Boltkrīvejis puorrūbežu sadarbeibys programys ītvorūs eistynuoja projektu “Museum Gateway”. Pasasokūt projekta i Daugovpiļs piļsātys dūmis finansialajam atbolstam, tyka izveiduots Šmakovkys muzejs, kas niu izvītuots Vīneibys nomā. Projekta ītvorūs SIA “Reklāmas aģentūra Bulterjers” sagataveja ari eisu “šmakovkys viesturi”, kurymā apkūpuoja Latgolys viesturis golvonūs pūsmus i tūs kontekstā apsavēre informaceju par styprūs dzierīņu lītuošonu, ceiņu pret dzeršonu i cytus sabīdreibai moz zynomus faktus par alkohola apriti Latgolā.

Da šam Latgolā nabeja izdūta gruomota par Latgolys kulinaruo montuojuma dzierīnim, kas dūtu vaira informacejis par Latgolys kulinaruom tradicejom vysaidu nūvoda viesturis pūsmu kontekstā. Jaunajā izdavumā dūts boguoteigs faktologiskais materials i dzierīņa taiseišona i lītuošona teik apsavārta caur vysaidu viesturis laika pūsmu pryzmu.

Gruomotā ir vairuokys nūdalis: Latgolys viesturis golvonī pūsmi i alkohola izlītuojums; Šmakovkys ceļš Latgolā; Šmakovka periodikys ailēs; Folklorys kruotuveite; Jautrys dzejis ailis; Smīklu goboli; Šmakovkys taiseišona; Šmakovka gordai malteitei. Gruomotā īkļauti ari materiali par Latgolys šmakovkys muzejim, ekspozicejom i dzierīņa taiseišonys omota pratiejim. Gruomotā var atrasti ari vysaidys shemys, kurymuos paruodeits dzierīņa taiseišonys process i iedīņu recepti, kuru naatjemama sastuovdaļa ir šmakovka. 

Gruomotu veiduoja Daugovpiļs piļsātys pošvaļdeibys turisma i informacejis agenturys vacuokuo eksperte turisma jūmā Lolita Kozlovska, anotaceju latgalīšu volūdā tulkuoja Valentins Lukaševičs, krīvu volūdā – Irina Gorkina, angļu volūdā – Sandra Celmiņa. 

Gruomotys attaiseišonys pasuokums teik planavuots janvarī.