Rēzeknē pyrmatskaņuojumu pīdzeivuos koncertizvadums “Māras zemes ērģeļu gaisma”
Itūgod Juoņa Ivanova Rēzeknis Muzykys vydsškolys (JIRMV) vargaņu klase svieteis 25 godu jubileju. Tam par gūdu februarī ir paradzāti vairuoki pasuokumi, tymā skaitā Latgolys viestnīceibā GORS 18. februārī 18.00 pyrmatskaņuojumu pīdzeivuos vargaņu klasis absolventim veļteits vargaņu muzykys koncertizvadums “Māras zemes ērģeļu gaisma”, informej JIRMV vargaņu spēlis školuotuoja Guna Kise.
Koncertizvaduma stuosts ir baļsteits iz Latgolys Dīvnomu apceļuošonu, rodūt kotra vargaņu klasis absolventa dzymtū pusi, nu kuruos jī ir davušīs iz Juoņa Ivanova Rēzeknis Muzykys vydsškolu, kab īpazeitu vargaņu muokslys burveibu. Bazneicys kūpā ar skateituojim apceļuos akters Kristaps Rasims. Iz Latgolys viestnīceibys GORS skotuvis dzierdēsit i redzēsit Rēzeknis, Bieržgaļa, Kuorsovys, Bolvu, Varakļuonu, Stiernīnis i Preiļu bazneicu varganis.
Muzykalū gaisūtni papyldynuos Guntrys Kuzminys bolss i muzyka, kai ari jaunīšu vokaluos studejis “Skonai” dzīduojums. Sovukuort koncertizvaduma nūslāgumā gaidoms eipašs gosts, vargaņu muokslys meistars, profesors Tālivaldis Deksnis, kuruo vadeibā leluokuo daļa absolventu ir sajāmuši bakalaura i magistra grādus J. Vītuola Latvejis Muzykys akademejā.
Pyrmū reizi iz GORA skotuvis varganis sasatiks duetūs ar vejūli (Zane Kurme) i saksofonu (Santa Bukovska). Sovu daudzpuseigū talantu demonstrēs vargaņu klasis absolventis Ilze Grēvele i Agnese Urka, kas nu izcyli dorbojās vokalajā muzykā.
Koncertizvadumā skanēs vairuoki vargaņu jaundorbi, kas radeiti eipaši vargaņu klasis jubilejam i veļteiti izcylim varganistim, kas guojuši nu Latgolys. Unikals jaundorbs varganem četrrūceigi i četrkuojeigi RIGA ORGANUM DUO (Ilona Birgele i Diāna Jaunzeme-Portnaja) izpiļdejumā, kū komponiste Dzintra Kurme-Gedroica ir radejuse taišni ituom muzikem. Taipat komponists Rihards Dubra ir pīrakstejs vargaņu dorbu par Latvejā tik cīši īmīļuotū kora dzīsmis temu “Tu skaistuo Dīva Duorza rūze”, ko atskaņuos varganiste i niulejuo vargaņspēlis školuotuoja Guna Kise. Tū vysu dvēseliskā stuostā apvīnuojs režisors Ugis Brikmanis.
Juoņa Ivanova Rēzeknis Muzykys vydsškolys vargaņu klasis 25 godu jubileja nūtikšonys:
17. februarī 18.00 – Svātais Mišs Rēzeknis Suopu Dīvmuotis bazneicā
18. februarī 18.00 – Koncertizvadums “Māras zemes ērģeļu gaisma” Latgolys viestnīceibā GORS
19. februarī 16.00 – Gavieņa laika muzyka Jezus Sirds katedralē, Rēzeknē.
