Muokslinīkus aicynoj īsnīgt dorbus Pīguožņa bolvai
Da 31. janvara muokslinīki aicynuoti īsnīgt pādejūs treis godu laikā radeitūs dorbus 2017. goda Jezupa Pīguožņa bolvai Latvejis ainovu gleznīceibā. Dorbu īsnīgšona nūteik Reigys Sv. Pītera bazneicā dorba dīnuos nu 10.00 da 18.00. Īsnīgtūs dorbus izviertēs žureja, atlaseitī dorbi pīsadaleis bolvys izstuodē Reigā i nūvodūs.
Kab veicynuotu atteisteibu izstuodis organiziešonā i bolvys pīškieršonys procesā, itūgod veikti uzlobuojumi bolvys nūlykumā, nu kurūs golvonī paredz žurejis sastuova atlasi tik nu muokslys profesionaļu i tū, ka izstuodis atkluošonā Reigā tiks paziņuoti pat da septeņu bolvys nominantu. Golvonū bolvu 3000 eiro apmārā i zalta medaļu taipat kai da šam finansej Preiļu nūvoda dūme, i tuos padūšona nūtiks rudinī Preiļūs. Itūgod izstuodis žurejis prīšksādātuoja ir 2016. goda bolvys sajiemieja muokslineica Silva Linarte, juos papraseituo žurejis lūcekle ir muokslineica Vita Merca. Preiļu nūvoda dūmis izvierzeituo žurejis lūcekle ir muokslys zynuotneica Ingrīda Burāne, Reigys Dūmis Kulturys puorvaļdis delegats ir muokslinīks Jurs Gērmanis i Pīguožņu dzymtys delegātais žurejis lūceklis ir muokslinīks Kārlis Siliņš. Žurejā dorbuosīs ari Jezupa Pīguožņa bolvys Latvejis ainovu gleznīceibā iniciatori muokslinīki Juoņs Anmanis i Juoņs Strupulis.
Jezupa Pīguožņa bolva Latvejis ainovu gleznīceibā itūgod nūteik jau trešū reizi. Īprīkš bolvys sajāmuši muokslinīki Roberts Muzis i Silva Linarte. Bolva ir īdybynuota, kab gleznīceibā turpynuotu popularizēt i atteisteit Latvejis ainovu i kab vīnuotu golvyspiļsātys i nūvodu kulturys procesus. Bolvys izstuodis dūd vareibu muokslinīkim reizē izstuodeit Latvejis ainovai veļteitūs dorbus i skateituojim nūviertēt ainovys žanra atteisteibu Latvejis muokslā. Latvejā ainovys žanrā struodoj daudzi i cīši dažaidi muokslinīki, tok izstuodēs vysus autorus vīnojūšais kods ir mīlesteiba iz sovu zemi, kurū kotrys atkluoj caur sovu skotu prizmu i ar sovim muokslinīciskuos izteiksmis leidzeklim. Partū skateituojim vysod ir interesanti, i izstuodis apmekliejums ļaun sasaslēgt ar skaistuokū i pozitivuokū nu tuo, kū dorbu autori īraudzejuši Latvejis ainovā.
