Bīdreiba “Latgolys Studentu centrs” 2017. goda dorba cielīni planavoj izsuokt, pīduovojūt Daugovpiļs dzeivuotuojim i gostim atkluot Latgolu caur interesantom personeibom.

LgSC jaunīši ir apjiemeibys pylni lauzt stereotipus i paruodeit, ka Latgolā ir kū dareit i ir kas dora. Taišni partū bīdreibys birojā Daugovpilī aba, kai jaunīši tū sauc, Štabikā regulari gasteit tiks aicynuoti interesanti cylvāki i organizaceju puorstuovi, kurī pasadaleis ar sovu pīredzi.

Jau jaunnedeļ, 7. februarī, 18.00 bīdreibys “Latgolys Studentu centrs” (LgSC) Daugovpiļs biroja telpuos Reigys īlā 48-3 nūtiks pasuokums “Štabikā gosts”, kur apmaklātuojim byus vareiba īsapazeit ar Ainaru Puduli, izzynuot, kas ir “Latgolys Banka”, atkluot portalu iz Latgolu, kai ari izprast pošiniciativys i rodūšu ideju nūzeimi sovys finaņšu sistemys veiduošonā.