DVD formatā izdūta dokumentaluo kina “Īsamirdzi zvaigznem leidza” par dzīduotuoju Aiju Rimšu, informej projekta idejis autore Ineta Atpile-Jugane.

2015. goda 17. oktobrī Rēzeknis nūvoda dūmis Lelajā zalā pyrmizruodi pīdzeivuoja Latgolys entuziastu grupys “Biļdis” veiduotuo dokumentaluo kina par dzīduotuoju Aiju Rimšu “Īsamirdzi zvaigznem leidza” (ideja, scenarejs – Ineta Atpile-Jugane, video, montaža – Sergejs Čakāns, video – Artis Vītuols, dorba grupa – Pīters Laizāns, Edgars Blinovs). Kina radeita, kab atguoduotu naatkuortojamū i vys vēļ popularū dzīduotuoju, “Latgolys rūžeņu”, “kaprīzo meiteni” Aiju Rimšu (1967- 2005) 10 godu piec juos aizīšonys myužeibā.

Kina radeita laika pūsmā nu 2014. goda pavasara da 2015. goda rudiņa. Kinys radeišonā sovu atbolstu davuse i Aijis saime, i Aijis dzeivē tyvi i nūzeimeigi cylvāki, i muziki i Aijis kolegi, leidzgaitnīki. Kinā izmontuoti materiali nu Aijis saimis arhiva, Latvejis Televizejis arhiva, Latvejis Radejis arhiva, P. Laizāna, V. Lohovys, A. Dzērvis, A. Bondarenko personeiguo arhiva.

Nu kinys pyrmizruodis šaļts tei pīdzeivuojuse vaira par 50 izruodem vysā Latvejā (nu Rēzeknis da Jelgovys, nu Kurmenis da Kārku, nu Ceraukstis da Gaujīnys, nu Konstantinovys da Pļovmuižys, nu Mērdzinis da Nagļu….). Kinys veiduotuoju komanda pasasoka kotrai kulturys īstuodei i tuos vadeituojam par sadarbeibu, interesi, par eipašu kino kopejneicu organiziešonu, Aijis dzīšmu dzīduošonu, fotoalbumu puslopu puorškūrsteišonu, ekspresizstuodem, atmiņu stuostim par Aiju, sadarbeibā ar kuruom sareikuotys daudz i sirsneigys kinys izruodis. Paļdis kotram skateituojam, kurs guoja iz izruodem, raksteja viestulis, izsaceja sovys dūmys, dalejuos atmiņuos!

Itūšaļt kina daīmama DVD formatā (apsaverama i ar titrim latvīšu literarajā volūdā, i bez titru latgalīšu volūdā). Tū var īsaguoduot škārsteikla veikalā taiseitslatgola.lv, kai ari, rokstūt iz e-postu bildis@inbox.lv