Latgalīšu kulturys goda bolva “Boņuks” par myuža īguļdejumu latgalīšu kulturā itūgod tiks padūta dirigentim i školuotuojim Vitoldam i Antoninai Milaševičim, informej Latgolys viestnīceibys GORS puorstuove Edeite Husare.

Svātdiņ, 26. februarī, Latgolys viestnīceibā GORS nūtiks Latgalīšu kulturys goda bolvys “Boņuks 2016” svineiguo ceremoneja, kurā tiks gūdynuots 2016. goda veikums latgalīšu kulturā 18 nominacejuos. Nominacejis “Par myuža īguļdejumu latgalīšu kulturys atteisteibā” gūdu itūgod sajims dirigenti i školuotuoji Antonina i Vitolds Milaševiči, kurūs rodūšais myužs ir nūzeimeigs īguļdejums Latgolys i Latvejis kulturā. Bez obeju izcylūs personeibu davuma i jūs audziekņu sasnāgumu nav īdūmuojama Latgolys pādejuo godu symta koru kulturys aina. Dirigenti vysod veicynuojuši i populariziejuši latgalīšu tautysdzīsmis skaniejumu, īkļaušonu koru muzykys repertuarā i rūsynuojuši komponistus veiduot latgalīšu dzīšmu apdaris.

Antonina i Vitolds Milaševiči ir latgalīši. Antoninys (Keišys, bīžuok sauktys Antys) dzymtuo puse ir Baļtinova. Vitolda dzymtuo puse ir Aglyuna. Vitolds i Anta sasatyka Rēzeknis muzykys vydsškolā i nu tuo laika i saimis klopotys, i rodūšī dorbi tyka daleiti iz pusem. Div rodūšys personeibys, dirigenti soka, ka nikod nav izjutuši greizsirdeibu pret ūtra dorbu voi panuokumim. Taišni ūtraiž, vysu myužu jī vīns ūtram ir bejuši leluokais atspaids – i rodūšajā, i ari saimis dzeivē, kurā tikū nūsvietejuši zalta kuozu jubileju.

Antonina Milaševiča (dz. 1938. g.) 1956. godā īsastuojuse Rēzeknis muzykys vydsškolā. Kora dirigiešonu absolvējuse pi Antoninys Mežinskys. Piec muzykys vydsškolys suokuse studēt Latvejis Vaļsts konservatorejis Kordirigiešonys nūdaļā Imanta Kokara klasē. Tai kai Anta Reigā vuicejuos nakluotīnē, tod piec muzykys vydsškolys beigšonys suokuse dorba gaitys Rēzeknē. Nu 1960. goda struoduojuse par dirigiešonys pedagogi Rēzeknis muzykys vydsškolā, izvuicejuse jaunu latgalīšu dirigentu paaudzi, vadejuse dirigentu vuiceibu kori. Vuiceibu laikā i vāluokajūs godūs dzīduojuse vairuokūs korūs i ansambļūs: sīvīšu vokalajā kvartetā “Latgale” kūpā ar vadeituoju A. Mežinsku, E. Slišāni i A. Šņukuti, Ulda Baluoža vadeitajā TK “Ezerzeme”, Rēzeknis Suopu Dīvmuotis bazneicys korī. Vairuokus godu desmitus bejuse Rēzeknis koru dirigente: 1966.–1981. godā kūpā ar golvonū dirigenti A. Mežinsku sīvīšu TK “Ieviņa” ūtrei dirigente; 1972.–1982. godā kūpā ar dzeivisbīdru Vitoldu Milaševiču jauktuo kora “Saskaņa” dirigente; vadejuse Brīžucīma sīvīšu vokalū ansambli. Kai koru dirigente i dzīduotuoja pīsadalejuse vysūs XIII–XX Vyspuorejūs latvīšu Dzīšmu svātkūs, Latgolys nūvoda dzīšmu svātkūs i koru festivalūs, bejuse zonalūs dzīšmu svātku viersdirigente Rēzeknē, Bolvūs, Ludzā.

Vitolds Milaševičs (dz. 1942. g.) 1960.gadā īsastuojs Rēzeknis Muzykys vydsškolys Kordirigentu nūdaļā, kur pedagoga Ulda Baluoža vadeibā vuicejīs dirigiešonu. Veseleibys i finansialuo stuovūkļa deļ nav saguojs studēt Latvejis Vaļsts konservatorejā, nu, atīmūt nu armejis, suocs struoduot – suokumā 5. vydsškolā, piec tam pakuopiniski ari Bārnu muzykys školā par solfedžo školuotuoju, kluot vēļ 10 godu dorbuojīs kai bārnu kora školuotuojs, cikom rodusēs ideja par puišu kora dybynuošonu. 1976. godā izveiduojs puišu kora klasi, kurū vadejs da 1993. goda. Vitolda bejušī audziekni Eriks Čudars, Gunārs Igaunis, Anda Lipska, Tatjana Davidovska, Rita Pavloviča i cyti palykuši par prasmeigim i talanteigim muzykys pedagogim i dirigentim. Sadarbeibā ar dirigenti Ruotu Salmiņu 1988. godā izveiduojs jaunīšu kori “Ezerzeme”. Tuoļuok ituo kora vadeišonu nūdevs sovim bejušajim školānim E. Čudaram i A. Lipskai. Kūpā ar dzeivisbīdri Antoninu Milaševiču 1981. godā suocs Rēzeknis Pīna konservu kombinata jauktuo kora “Saskaņa” vadeišonu. Nu 1985. goda bejs Rēzeknis rajona školuotuoju kora “Rāzna”, nu 1992. gada jaunizveiduotuo Rēzeknis Školuotuoju instituta sīvīšu kora dirigents. 1992.–1995. godā vadejs Rēzeknis Jezus Sirds katedralis jaunīšu kori. 1971.–1993. godā seši V. Milaševiča vadeitī kori pīsadalejuši vysūs Vyspuorejūs latvīšu i Latvejis Školu jaunatnis Dzīšmu svātkūs. Bejs Rēzeknis rajona i Rēzeknis piļsātys koru viersdirigents. Sovys pedagogiskuos darbeibys laikā veics nūzeimeigus sasnāgumus bārnu koru kulturys leimiņa ceļšonā.

Svineiguo bolvys padūšonys ceremoneja nūtiks 26. februarī 16.00 Latgolys viestnīceibys GORS Lelajā zalā. Ceremoneju ar muzykalim prīšknasumim kuplynuos grupys “Dabasu Durovys”, “Piparmētra”, “Sovvaļnīks”, projekts “Jezups i Muosys”, folklorys kūpa “Upīte”, tradicionaluos muzykys grupa “Tautumeitas”, solistu apvīneiba “Jubilāri”, dzīsminīks Kārlis Kazāks, veiru kors “Graidi”, postfolklorys grupa “Rikši”, Guntra Kuzmina, dzīsmineica Laura Bicāne.

“Boņuks 2016“ ceremoneju tīšraidē varēs vērtīs ari “LMT Straume“ tīšraidē.

Karteņa: Māris Justs/žurnals “A12”.