26. februara vokorā jau deveitū reizi tyka padūtys Latgalīšu kulturys goda bolvys “Boņuks” 17 nominacejuos sabīdreibys i kulturys, muzykys i literaturys sadaļuos. “Boņuks” ir vīneiguo bolva, kas eipaši izceļ i gūdynoj sasnāgumus latgalīšu kulturys dzeivē, verūtīs na tik Latgolys regionu, nu ari latgaliskuos aktivitatis cytur Latvejā i pasaulī. 

Latgalīšu kulturys goda bolvys “Boņuks 2016” sajiemieji:

Par myuža īguļdejumu latgalīšu kulturā – dirigenti i školuotuoji Vitolds i Antonina Milaševiči

Sabīdreiba i kultura:

Goda cylvāks kulturā: Ilga Šuplinska

Goda nūtikšona: Latvejis Radejis Latgolys multimedeju studejis atkluošona

Par latgalīšu volūdys populariziešonu:
Latgalīšu kulturys ziņu portals LaKuGa.lv

Goda amatnīks/saiminīks: Preiļu tierdznīceibys centra “Ūga” saiminīki Ingūna i Aigars Zīmeli

Goda snāgums vizualajā muokslā: Muokslineica Daina Salmiņa

Goda snāgums skotuvis muokslā:
Rēzeknis Tautys teatra izruode “Pupas”

Goda snāgums audiovizualajā muokslā: Latvejis kods. Dokumentaluo kina “Runātāji”

Par latgalīšu kulturys populariziešonu Latvejā i pasaulī: Dokumentaluo kina  “Likteņzeme”

Muzyka:

Lobuokais snāgums pop/rock muzykā: “Sovvaļnīks” ar albumu “Napaseitynuots”, videoklipu i koncertdarbeibu

Lobuokais snāgums tautys muzykā:
Tradicionaluos dzīduošonys grupa “Saucējas” ar izdavumu “Trīci, munu ustabeni” i koncertdarbeibu

Lobuokais snāgums alternativajā muzykā: Projekts “Jezups i Muosys” ar albumu “LAI SLAVA JAM!”, videoklipu i koncertdarbeibu

Lobuokais snāgums akademiskajā muzykā: Kamerkors “Muklājs” ar albumu “Ar Laimeņu runojūt”

Lobuokais muzykys video: “Jezups i Muosys” ft. Guntix ft. Jezups Martinovs – “Sirds. Sirds. Sidrs”

Goda debeja muzykā: Grupa “Piparmētra”

Lobuokais snāgums šlagermuzykā:
Grupa “Dvinskas muzikanti” ar dzīsmis “Hej, bruoļ latgalīt” sasnāgumim i koncertdarbeibu

Literatūra:

Lobuokais snāgums literaturā:
Sandra Ūdre, Juoņs Ryučāns – romans “Aizlauztais spaits”

Lobuokais izdavums/gruomota:
Gruomota i audio CD “Škilbanu sīvas”. Edīte Husare, Anda Beitāne

Bolvu padevieju, nu kurūs rūku tyka sajimti Boņuki, itūgod beja volūdneica Lideja Leikuma, muziki Renārs Kaupers i Goran Gora, fotografe Iveta Vaivode, muzikis, žurnalists i reklamys sferys specialists Aigars Runčis, Latvejis Nacionaluo kulturys centra vadeituoja Signe Pujāte, šova “Īstās latvju saimnieces“ dalineica, zyrgu sātys “Klajumi“ saimineica Ilze Stabulniece, režisors Viesturs Kairišs, fonda “Viegli“ puorstuove Žaneta Jaunzeme-Grende, rakstneica Inga Ābele, režisors Juoņs Streičs, komponists Andrejs Selickis, varganiste Iveta Apkalna i cyti.

Ituo goda Latgalīšu kulturys goda bolvys “Boņuks 2016“ padūšonys ceremoneju kuplynuoja latgalīšu muziķu prīšknasumi – ceremonejā uzastuoja “Dabasu Durovys“, Sovvaļnīks, Guntra Kuzmina, “Piparmētra“, “Tautumeitas“, “Rikši“, folklorys kūpa “Upīte“, Laura Bicāne, “Jezups i Muosys“, “Jubilāri“, bet ceremonejis nūslāgumā izskanieja veiru kora “Graidi“ i puorejūs muziķu i skateituoju kūpdzīsme, Valda i Māra Muktupāvelu saraksteituo “Pīmiņ, bruoļ!“.

Ceremoneju beja vareiba pīdzeivuot na tik kluotīnē, Latgolys viestnīceibys GORS Lelajā zalē, bet ari tīšraidē, kū nūdrūsynuoja lītuotne “LMT Straume“, kurymā kotrys grybātuojs varēs nūsavērt ari ceremonejis video īrokstu.

Latgolys viestnīceiba GORS, Latgalīšu kulturys goda bolvys “Boņuks 2016” organizātuoji, aicynoj kotru interesentu jau niu sekuot leidza latgalīšu kulturys nūtikšonom 2017. godā, kab dasaceitu bolvai i gūdynuotu dasmytajā Latgalīšu kulturys goda bolvys “Boņuks“ ceremonejā 2018. goda 25. februarī. Itys gods Latgolai ir jo eipašs, jo leidza ar Latgolys kongresa symtgadis nūtikšonom aprelī i majā teik suokta Latvejis symtgadis svieteišona.

Latgalīšu kulturys goda bolvys „Boņuks“ mierks ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā pārnejuo goda grīzumā. “Boņuks 2016” nūtikšonu atbaļsteja Vaļsts kulturkapitala fonds, Rēzeknis piļsātys dūme, Rēzeknis nūvoda, Aglyunys, Baļtinovys, Bolvu, Cyblys, Dagdys, Kuorsovys, Ludzys, Rībeņu, Ruguoju i Viļakys nūvodu pošvaļdeibys. Informativī atbaļsteituoji: žurnals “Ir“, Latgalīšu kulturys gazeta LaKuGa.lv, Latgolys radeja, “Vaduguns” i “Latgales Laiks”.