3. majā Latgolys Kulturviesturis muzejā tiks atkluota tematiska izstuode “Pāri slieksnim”, kas veļteita viesturiskai nūtikšonai – Pyrmajam Latgolys kongresam, informej muzejpedagoge Inese Ločmele-Jansone.

1917. goda 9.-10. majā (piec vacuo stila 26.-27. aprelī) Rēzeknē nūtyka Pyrmais Latgolys kongress, kurymā tyka pījimts lāmums par Latgolys atsadaleišonu nu Vitebskys gubernis i apsavīnuošonu ar puorejim Latvejis nūvodim. Itys lāmums beja izškirūšais tuoluokajom nūtikšonom, kod 1918. goda 18. novembrī tyka proklamāta Latvejis Republika.

Atzeimojūt Pyrmuo Latgolys kongresa 100. godadīnu, Latgolys Kulturviesturis muzejā da goda beigu byus apsaverama izstuode “Pāri slieksnim”. Kotrai sātai ir pamati i slīksnis. Slīksnis ir ari nūzeimeiga kotrys sātys sastuovdaļa. Pījamūt, ka Latvejis zeme (viesturiskī 3 nūvodi) ir ituos sātys pamati, tod 1917. goda Pyrmais Latgolys kongress ir kai slīksnis, kurs juopuorkuop, kab tyktu sātā – Latvejā. Izstuodē varēs īpazeit autentiskus prīškmatus, dokumentus, kartenis, ar audio, video, gaismys projekceju paleidzeibu tiks radeita laikmata nūskaņa.    

Taipat teik pīduovuota ceļojūšuo izstuode. Tei sastuov nu sešu divpusieji apsaveramu stendu i vīnys divpusiejis plakatsīnys. Vīnā stenda pusē izvītuota informaceja, kas atkluoj vysaidus viesturis olūtus, faktus i nūtikšonys. Ūtrei puse veiduota izgleitojūša ar vareibu školānim školuotuoja vadeibā diskutēt par viesturis nūtikšonom i dorba lopuos piļdeit aizdavumus.

Muzejs aicynoj izgleiteibys īstuodis dasaceit ceļojūšuos izstuodis eksponiešonu sovā školā, rokstūt iz e-postu muzejs@rezekne.lv voi zvonūt t. 64622464. Izstuode ir bez moksys, nu tuos transportiešonu jūnūdrūsynoj dasaceituoja organizacejai. Izstuodi var dasaceit da goda beigu i ari cytugod, kad Latveja svieteis 100 godus.