Kuorsova vysūs laikūs bejuse vīna nu latgaliskuos kulturys centrim. Latgalīšu volūdu kasdīnā lītoj vairums kuorsovīšu, bet par latgalīšu volūdys populariziešonu juopalīlej Kuorsovys nūvoda pošvaļdeiba, kura regulari ar vysaidu projektu paleidzeibu rauga veicynuot latgalīšu volūdys saradzameibu apleicejā vidē i sovstarpejā komunikacejā. Kuorsovys vītejūs jaunīšu iniciativa i daleiba Latgolys kulturys programys projektu konkursā ar projektu “saREDZI latgalīšu volūdu” raisejuse na mozums osu diskuseju kai škārsteiklā, tai sadzeivis sarunuos.

Projektā “saREDZI latgalīšu volūdu” 2014. godā iz daudzom piļsātys īlom tyka pastateitys īlu nūruodis gon latvīšu literarajā volūdā, gon latgaliski(juoatzeimoj, ka golvonajā īlā – Vīneibys īlā – jau īprīkš piec cyta projekta nūruodis tyka pastateitys latvīšu literarajā volūdā). Kūpumā divu godu laikā tyka izvītuotys 300 īlu nūruodis divejuos volūduos, tymā skaitā īlu nūruodis latgalīšu volūdā ir pastateitys ari Kuorsovys nūvoda pogostu apdzeivuotajuos vītuos – Mežvydūs, Ūtrajūs Mežvydūs, Mērdzinē, Pudynovā, Golyševā, Malnovā, Bozovā, Saļņovā, Ruskulovā.

2015 goda rudinī Vaļsts volūdys centrs (VVC) izsaceja aizruodiejumus par latgalīšu volūdai īruodeitū golvonū vītu (t. i., uzroksti latgaliski ir leluoki par uzrokstim latvīšu literarajā volūdā), kai ari aicynuoja nakavejūši īlu nūruodis nūjimt.
Kūpsummā Kuorsovys nūvoda pošvaļdeiba treis godu laikā sajāmuse treis izvārstys viestulis nu VVC par latgaliskom īlu nūruodem (divys 2015. godā i vīnu 2016. godā). Kai atzeist Kuorsovys nūvoda sabīdriskūs attīceibu specialiste Inese Krivmane: “Ni vīnā nu tom nabeja juridiski pamatuota argumenta par nūruožu maineišonu. Niu sarunys ir nūsaslāgušys i VVC Kuorsovys nūvoda pošvaļdeibai vairs nalyudz maineit īlu nūruodis.” Vaicuota par tyvuokajim projektim, kas byutu saisteiti ar latgalīšu volūdu, Inese stuosta: ”Tyvuokajūs planūs ir sataiseit Kuorsovys nūvoda pošvaļdeibys sātys lopai latgalīšu volūdys izvielni.”
Īlu nūruodis latgaliski ir vīns nu veidu, kai myusu dīnuos akcentēt Latgolys kulturviesturiskū montuojumu i mudynuot turistus pamaneit volūdys daudzveideibu i boguoteibu, bet vītejim – īsavuiceit latgalīšu rokstu volūdys pamatus. 2016. godā projektam tyka pīškierta ari Latgalīšu kulturys goda bolva “Boņuks” par latgalīšu volūdys populariziešonu.
Kuorsovys nūvods ir breineigs pīmārs tam, ka latgalīšu volūda ir dzeiva i var pastuovēt ari modernajā vidē. Byutu breineigi, ka ari cytys pošvaļdeibys nasabeitu i sekuotu Kuorsovys pošvaļdeibys pīmāram.