17. aprelī 16.00 Latgolys viestnīceibā GORS nūtiks Aglyunys bazilikys Kora školys 25 godu jubileja koncerts, kurymā vysaiduoku laikmatu vokalū, klavīru i vargaņu muzyku izpiļdeis školys audziekni i absolventi, informej Aglyunys bazilikys Kora školys direktore Īva Lazdāne. Īīšona koncertā – par zīduojumim.

Aglyunys bazilikys Kora škola rodusēs laikā, kod Aglyunā i vysā Latvejā beja tai saucamais “pavesta Juoņa Puovula II gaideišonys laiks”. Nūtyka bazilikys i laukuma leluo rekonstrukceja. Pyrmī 12 Kora školys audziekni, īmūt iz stuņdem bazilikys klūstera telpuos, laksteja pa izroktū laukumu, baudeja skotu, kod puorbyuvis laikā iz Dīvmuotis svātgleznu varēja vērtīs nu niulejuos apakšejuos bazneicys leimiņa.

Ari pavesta vizeitis laikā itim pyrmajim audzieknim beja veicami nūteikti aizdavumi. Nu tys vyss nūtyka… pyrma 25 godu. 25 godu laikā Kora školys audziekni ir pīsadalejuši i uzvarējuši Latgolys, Latvejis i storptautyskajūs konkursūs, daudzi školys absolventi ir turpynuojuši izgleiteibu muzykys vydsškoluos, Jezupa Vītuola Latvejis Muzykys akademejā.

Treis absolventis sovā školā jau atsagrīzušys kai školuotuojis. Školys 4.–9. klašu kors ir Vyspasauļa bārnu i jaunīšu koru federacejis PUERI CANTORES bīdrys i regulari pīsadola tuos kongresūs-festivalūs (tī nūteik ik piec div godu kaidā nu Eiropys piļsātom).

Školys kori dzīd dīvkolpuojumūs Aglyunys bazilikā. Jaunī varganisti na tik vuicuos vargaņu spēlis nūslāpumus, nu ari spielej dīvkolpuojumūs bazilikā. Nu Kora školys ir “izaudzs” jauktais kors ASSUMPTA. Školys spāks ir rodūšais školuotuoju kolektivs.

Jubileja koncertā skanēs vokaluo, klavīru i vargaņu muzyka. Tū izpiļdeis školys audziekni i absolventi. Dzīduos školys 2.-3. i 4.–9. klašu kori, jauktais kors ASSUMPTA.