Jaunnedeļ ar daudzi vierīneigom nūtikšonom vysaiduos Latgolys vītuos atzeimuos Latgolys kongresa symtgadi. Svineibu centraluo nūtikšona byus 4. pasauļa latgalīšu kongress. Raidejumā “Kolnasāta” gastej Latgolys kulturys darbinīks i nazkod aktivs žurnalists Voldemārs Ivdris. Kūpā ar jū raidejuma vadeituojs Ēriks Zeps pietej Latgolys kongresa symtgadis svātku programu i atsaver iz īprīkšejim latgalīšu kongresim, kas nūtykuši 1992., 2002. i 2012. godā.

Sižetā teik viesteits par pasuokumim Daugovpilī. Par svātku programu stuosta Daugovpiļs piļsātys dūmis Kulturys puorvaļdis vadeituojis vītneica Vita Vilevko. Sovukuort Daugovpiļs teatra režisors Olegs Šapošnikovs stuosta par Fraņča Trasuna lugu “Nūgrimušō pile”, kurei pīdzeivuos pyrmizruodi maja suokuos.

Latgolys kongresa symtgadis svātku programa eipaši izceļs latgalīšu volūdu. Latgalīšu volūdys boguoteibu i skaistū skaniejumu atkluos “Latgalīšu volūdys naktī”. Nu 5. maja vokorpusis da nuokušuos dīnys reita bez puortraukuma Rēzeknē skanēs latgalīšu volūda. Vysys nakts garumā iz skotivis kuops latgalīšu literati i muziki.