3. majā 13.00 Latgolys Centraluos bibliotekys (LCB) daiļliteraturys sektorā (2. stuovā) Muokslys dīnu pasuokumu cykla ītvorūs tiks atkluota muokslinīka Juoņa Plivdys gleznu personalizstuode “Krāsu mirkļi”, informej LCB puorstuove Inga Gedžūne.

Juoņs Plivda ir Preiļu muokslinīks, pabeidzs Rēzeknis muokslys koledžu i studiejs Latvejis Muokslys akademejis (LMA) Latgolys filialis Gleznīceibys nūdaļā pi pasnīdzieju A. Zelča i O. Zvejsalnieka. Magistra grādu sajiems Reigā LMA. Itūšaļt struodoj par pasnīdzieju Rēzeknis Muokslys i dizaina vydsškolā.

Juoņa Plivdys kompozicionali pīsuotynuotuos ainovys ir cīna i mīlesteibys aplīcynuojums dobai. Juo izpratnē ainova ir patstuoveiga vierteiba, kurei muokslys volūdā var pasaceit daudz vaira kai suokumā ruodīs. Caur sovim dorbim muokslinīks gryb atkluot i sev, i cytim apleicamuo pasauļa dzeivū i maineigū dobu, kurei uzrunoj i saista ar sovu naizsmeļamū vitalitati. Da šam Juoņa Plivdys gleznys ir bejušys apsaveramys Preiļūs, Ludzā, Kruoslovā, Rēzeknē, Leivuonā, Utenā (Lītova) i ari Daugovpilī.

Latgolys Centralajā bibliotekā muokslinīka dorbi teik izstuodeiti pyrmūreiz. Izstuodē “Krāsu mirkļi” skateituoju viertiejumam teik pīduovuoti puorsvorā jaunuokī dorbi, kas radeiti pādejuo goda laikā. Jauni stuosti, kūšys i naparostys kruosu kombinacejis, gleznīciskuo sprīdze formu interpretacejā i kruosu laukumu kluošonys manīrē. Skateituoji ir aicynuoti rast prīcu i smeļt īdviesmi itamā kruosu puorpiļneibā.

Juoņa Plivdys izstuode “Krāsu mirkļi” byus apsaverama LCB daiļliteraturys i nūzaru literaturys sektorūs da 31. maja.