“Pi myusim Latgolā” – par muzeju nakti Daugovpilī i Rēzeknē
Itymā nedeļgolā Muzeju nakts ītvorūs uorpus īrostuo dorba laika muzeji i cytys kulturys i sabīdryskuos īstuodis attaiseis sovys durovys, kab paruodeitu sovus duorgumus cytā gaismā. Raidejuma “Pi myusim Latgolā” veiduotuoji gastej leluokajuos Latgolys piļsātuos, kab dazynuotu, kaidus puorsteigumus apmaklātuojim gatavej muzeji Daugovpilī i Rēzeknē.
Daugovpiļs Nūvodpietnīceibys i Muokslys muzeja sabīdryskūs attīceibu specialiste Nataļja Ivanova pastuosteja, ka Muzeju nakts laikā Daugovpilī sovys durovys attaiseis 11 muzeji, kulturys i sabīdryskuos īstuodis. Tymā skaitā Šmakovkys muzejs, Muola muokslys centrys, Skrošu fabrika, luteraņu bazneica, sinagoga i pat piļsātys dūme.
Daugovpiļs Nūvodpietnīceibys i muokslys muzejā vokora kulminacejā paradzāta uguņuošona 19. godu symta stilā. Zane Melāne dasoka, ka puorsteigumu pylna nakts gaidoma i Daugovpiļs Marka Rotko muokslys centrā. Tī byus apsaveramys jau asūšuos ekspozicejis, centra pogolmā nūtiks karaliskuo “Martas balle”, kurā dasadaleit varēs sevkurs grybātuojs. Taipoš byus apsaverama eipaši izgaismuota betona instalaceja.
Sovpus Maija Upeniece atkluoj, kas apmaklātuojus sagaida Muzeju naktī Rēzeknē. Īsadvasmojūt nū kūpejuos laika rota temys, Rēzeknē tei tyka atvasynuota da dzagiuzis “Ku-kū”. Maija stuosta, ka Rēzeknē Ku-kū byus vysaidūs veidūs. Ari Rēzeknes Zaļuo sinagoga i Latgolys viestnīceiba GORS Muzeju naktī gaideis apmaklātuojus.
