4. junī 15.00 Baļtinovys muižys parka estradē nūtiks Zīmeļlatgolys izgleiteibys īstuožu pyutieju orkestru koncerts – festivals “Taures skan Baltinavā!”, viestej informaceja Baļtinovys nūvoda sātyslopā.

Festivals, kurs nūtiks jau ūtrū reizi, itūgod veļteits Latgolys kongresa symtgadei. Pyutieju orkestri, kas vysūs laikūs veiduojuši kulturys dzeivi Latgolā, vīnuosīs kūpeigūs meļdeņūs, atguodynojūt, ka pyutieju orkestru eipašais skaniejums ir bejs i byus nūzeimeiga daļa nu latvīšu i ari latgalīšu identitatis, kurymā jau pyrma symts i vaira godu īkodāts myusu vīneibys spāks.

Festivalā pīsadaleis Bolvu Muzykys školys orkestris, Baļtinovys Muzykys i muokslys školys orkestris, Kuorsovys Muzykys i muokslys školys orkestris, Rēzeknis 5. vydsškolys orkestris, Rēzeknis 6. vydsškolys orkestris. Koncerta ūtrajā daļā klauseituojus prīcynuos festivala eipašī gosti – Īva Kerēvica i Mirage Jazz Orchestra.

Dīnys garumā Baļtinovys muižys parkā byus daīmamys atrakcejis bārnim i dorbuosīs sātys ražuotuoju tierdzeņš.

Īīšona – bez moksys.