“Kolnasātā” gastej prīsters Aigars Bernāns. Jis kolpoj Preiļu pusē, Pīneņu i Znūteņu draudzēs. Iz juo vadeitajim dīvkolpuojumim ļauds brauc na tik nu tyvuokuos apleicīnis, nu ari nu tuolīnis.

Bez sovu tīšūs pīnuokumu Aigars aktivai īsasaista Latgolys kulturys i sabīdriskajā dzeivē. Naseņ pīsadalejs koncertizvadumā “Latgales gredzens”. Aigaram ir tyva folklora, kai pats pīzeist, izaudzs i ar bazneicys, i tautys tradicejom. “Maņ napateik, ka myusdīnuos tautys tradiceju kūpieji mieginoj nūdaleit, ka tys ir poguoniskais i tys ir Bazneicys, i ka Bazneica ir naideiga pret tautys tradicejom voi folkloru. Absoluts murgs! Tū pošu folkloru Latgolā pyrmī suoka vuokt bazneickungi. Nikod nav bejs pretrunu storp bazneicu i tautys tradicejom,” soka prīsters.

Pyrma kaida laika jis iniciēja albuma “Dzīsmis ap Dīva Pīdzimšonu” izdūšonu, tymā īkļautys senejuos katuoļu Zīmyssvātku dzīsmis. Nazkod gastejs ari pi Sibira latgalīšu. Par tū vysu vaira sarunā ar bazneickungu Aigaru Bernānu.

Vuordineicā literaturzynuotnīks Valentins Lukaševičs, viesturnīks i muzikis Arņs Slobožanins apsprīž vuordu “pārkiuņs”, nu Vineta Vilcāne sasatyka ar div Sibira latgalītem, kurūs seņči vaira kai pyrma 100 godu zemis mekliejumūs devēs iz Krīvejis imperejis attuolajim apgobolim. Juos nu tuolīnis beja īsarodušys iz 4. pasauļa latgalīšu saītu.