Itamā reizē “Kolnasāta” gasteja Daugovpilī, kab satyktu treis radūšus i uzjiemeigus cylvākus: Sandru Poplavsku, Juoni Rimicānu i Arni Slobožaninu. Jī tikū skateituoju viertiejumam nūdavuši raidejumu “Latgalīšu volūdys sorgi. Vladislavs Lōcis”. Tymā īmyužynuota latgalīšu gruomotizdevieja Vladislava Luoča (1912 – 1984) pīmiņa.

20. godu symta 30. godu beiguos Luocs Daugovpilī izveiduoja latgalīšu gruomotu izdevnīceibu, da Ūtruo pasauļa kara suoku paspēja izdūt viņ puors gruomotys latgalīšu rokstu volūdā. Izdevieja darbeibu atsuoce nacistiskuos Vuocejis okupacejis godūs, vāluok devēs trymdā iz Vuoceju. Atlykušū myuža daļu pavadeja Vuocejā i turpynuoja izdūt gruomotys latgaliski.

Studejis 3KM radūšuo grupa ari itūgod pīduovuos raidejumu “Sajūti Latgali”. Ūtrajā sezonā tam byus jauns vadeituojs – muzikis Jurs Ostrovskis.

Taipat raidejumā žurnaliste Gunta Nagle pieteja, voi myusu dīnuos latgaliski izdūtuos gruomotys teik atseviški uzskaiteitys i kaidus latgalīšu autoru dorbus meilu pruotu skaita daugavpilīši.