Daugovpiļs nūvods aicynoj Juoņa dīnu svieteit Vyškūs
Ari itūgod leluokais Daugovpiļs nūvoda Juoņu svieteišonys pasuokums 23. junī nūtiks Vyšku breivdobys estradē. Kai informej pošvaļdeibys agenturys “TAKA” puorstuovi, pasuokuma ītvorūs paradzāts koncerts bals, ols i sīra degustaceja, zuoļu tierdzeņš, amatnīku i sātys ražuotuoju pīduovuojumi, gunkurs i ļuste.
Itūgod pasuokums otkon puorsteigs ar teatralizātu izvadumu “Kazimirs Adamovičs maina profesiju”, kur jau nu īprīkšejuo goda Juonim vysim labi zynomais kolhoza prīšksādātuojs Kazimirs Adamovičs pastruoduos pavysam nagaideitus breinumus – nūpierks laika mašynu i dūsīs iz laimeigū nuokūtni, kab varātu sareikuot vysim kolhoznīkim ļusteigus svātkus. Nu laika mašynā koč kas nūīt na tai…
Pasuokuma organizātuojs – Daugovpiļs nūvoda pošvaļdeibys agentura “TAKA” grib svātku teatralizātajā izvadumā ļaut skateituojim baudeit ceļuojumu laikā i apmeklēt tuolys zemis i svešys tautys. Pasuokumu vadeis i narymstūšu jautreibu nūdrūsynuos Daugovpiļs teatra akteri Ritvars Gailums i Kristīne Veinšteina, koncertā laika mašynā ceļuos Tihovsku saime, Dubnys i Ambeļu folklorys kūpys, vokalais ansamblis “Anima Corde”, deju grupa “Rodeo meitenes”, vokalais ansamblis “Mōls”, deju studeja D&D, “Laimas muzykanti”. Piec saulrīta – zaļumbals ar “Laimas muzykantim” i grupu “Kruīzs”.
Dorbuosīs amatnīku i sātys ražuotuoju tierdzeņš, zuoļu tierdzeņš, pyrmuo tyukstūša skateituoju tiks pamīluoti ar ols gluozi i sīra gabaleņu, byus ari pīpyušamuos atrakcejis.
Pasuokums suoksīs 20.00, nu bals – 22.30 (degustacejis i tierdzeņš jau nu 19.30).
Īprīkšpuordūšonā beletus var īsaguoduot par 3 eiro (pasuokuma dīnā – 4 eiro): Daugovpiļs turisma informacejis centrā (Reigys īla 22a, Daugovpiļs), Daugovpiļs nūvoda pošvaļdeibys agenturā “TAKA” (Reigys īla 2, Daugovpiļs), Vyšku pogosta puorvaļdē (Školys īla 17, Špogu c., Vyšku pogosts, Daugovpiļs nūvods), kai ari bilesuparadize.lv
Pyrma Juoņu svieteišonys, 23. junī, 13.00 Malnovys koledžys Vyšku vuiceibu punkta zalā (Vyšku tehnikuma zalā) Storptautyskuo muokslys plenera ītvorūs nūtiks Špogu i Šarkovščinys (Boltkrīveja) muzykys školu audziekņu i školuotuoju koncerts, kurymā skanēs Leigū i Kupaļjis dzīsmis latvīšu tautys instrumentu pavadejumā.
