Pieci.lv i Latvejis Radejis Latgolys studeja nu 15. juņa pīduovoj muzykys kanalu “Pīci latgalīši”, kū var dzierdēt škārsteiklā.

Itūšaļt škārsteikla kanalā “Pīci latgalīši” klauseituojim teik pīduovuoti 700 vysaiduoku žanru latgalīšu muzykys skaņdorbi, tok tūs skaits regulari tiks papyldynuots. Kanalu var klauseitīs škārsteiklā Pieci.lv sātyslopā i ari mobilajā lītuotnē “Pieci”.

Atjaunuotuo škārsteikla muzykys kanala redaktors ir etnoroka grupys “Laimas Muzykanti” vadeituojs, muzikis Artūrs Uškāns i Latvejis Radejis 5 – Pieci.lv muzykys redaktors Rūdolfs Budze.

Škārsteikla radejis kanals “Pīci latgalīši” tyka izveiduots jau 2015. godā, tok itūšaļt tys atjaunuots i klauseituojim daīmams jaunā skaniejumā ar papyldynuotu muzykys kluostu i žanru daudzveideibu. Kanals pīduovoj i jaunys, i godu gaitā klauseituoju īmīļuotys dzīsmis, kū radejušys latgalīšu muziku grupys i izpiļdeituoji: “Dabasu Durovys”, “Rikši”, Sovvaļnīks, “Borowa MC”, “Bez PVN”, “Laimas Muzykanti”, “Green Novice”, “Gandreiž 10nīkā”, “Ilža” i cyti. Kūpā kanalā skanēs vaira par symtu dažaidu muziku radeituos i spālātuos kompozicejis, kuruos īdzeivynuota latgalīšu volūda.