Zylupis nūvoda Pasīnis pogostā atsarūn Grebļa kolns, kas ir unikala i aizsorgojama teritoreja. Te atrūnamys vysaidys aizsorgojamys augu, dzeivinīku i kukaiņu sugys. Kab akcentātu ituos eipašuos vītys unikalitati, 30. junī Grebļa kolnā pyrmū reizi nūtiks Tauriņu nakts.

Raidejuma “Pi myusim Latgolā” veiduotuoja Laura Sondore-Strode sasatyka ar Zylupis nūvoda turisma dorba organizatori i gidi Ilgu Ivanovu. Ilga pastuosteja, ka itei vīta ir dobys līgums ar eipašu mikroklimatu i augu vaļsti. Tī atrūnamys vairuokys tauriņu sugys, kas īraksteitys Latvejis Sorkonajā gruomotā.

Tauriņu nakts laikā apmaklātuojim specialistu pavadeibā byus vareiba apsavērt tī dzeivojūšūs tauriņus i cytus kukaiņus, kas tiks davylynuoti ar eipaša prožektora paleidzeibu. Izgleitojūšuos aktivitatis tiks papyldynuotys ar vysaidom rodūšom darbneicom, kab garlaiceigi nabyutu nivīnam.