“Kolnasāta” sasateik ar latgalīšu himnys “Pīmiņ, brōļ!” autoru Valdi Muktupāvelu
Raidejuma “Kolnasāta” producente Vineta Vilcāne sasateik ar etnomuzikologu Valdi Muktupāvelu, jis 80. gadu pošuos beiguos kūpā ar bruoli Māri sacerēja par latgalīšu himnu palykušū dzīsmi “Pīmiņ, brōļ!”. Sarunā Valdis stuosta, kai roduos dzīsme i kū dūmoj par vysaiduom dzīsmis apdarem, kas radeitys itūs godu laikā. Raidejumā skaņ Muktupāvelu radeituos dzīsmis “Pīmiņ, brōļ!” originalverseja.
“Kolnasātys” ūtrajā daļā raidejuma vadeituojs Ēriks Zeps izvaicoj Eviju Maļkeviču. Energiskuos jaunītis dzeive paīt storp Reigu i Latgolu. Evijis profesionaluo jūma ir saisteita ar dorbu UNESCO Latvejis Nacionalajā komisejā, sovpus breivais laiks teik veļteits latgaļu kulturys izzynuošonai i īdzeivynuošonai myusu dīnuos, dorbojūtīs Kroma kolna bruolistē. Evija voda ari bīdreibu “Teira Latgolys muoksla” i dora daudzys cytys interesantys lītys Latgolā.
