Itūreiz raidejuma “Pi myusim Latgolā” veiduotuoji gastej Drycānu pusē, kur niu dzeivoj aktivuo Anna Babre. Sovā cīnejamā vacumā jei aktivi leidzadorboj Latgolys kulturys dzeivē, globoj i kūp tautys tradicejis, kai ari izveiduojuse folklorys kūpu i muzeju Maltā, atgivuse dzymtys sātu Drycanūs, kur īkuortuojuse muzeju.

Anna Babre ir školuotuoja, folkloriste i aktiva Latgolys sabīdriskuo darbineica, dzymuse Rēzeknes apriņča Drycānu pogostā. Niu sovā eipašumā atgivuse dzymtū vactāva i tāva sātu i tī īreikuojuse muzeju. Izaruod, ka pošai sātai ir sovpateigs stuosts. Sovā laikā Fraņcs Trasuns īrūsynuojs Drycānu pusē izceļt školu deļ zemnīku bārnu. Školu īsvietejs Latgolā zynomais gareidznīks i školuotuojs – monsinjors Nikodems Rancāns.

Vāluok gon škola puorcalta iz Piļcinis muižu, i Annys Babris vacuoki itamā sātā svietejuši sovys kuozys. Anna Babre stuosta, ka itamā sātā svieteitys kuozys, reikuotys večerinkys i pat bēris. Tai kai tī vysod apsagrūziejuši ļauds, sātys leluo ustoba nikod nav sadaleita mozuokuos.

Niu Anna Babre tī īreikuojuse muzeju, kur laipni gaida sevkuru gostu. Sātā var apsavērt vysaidys gruomotys – vacys i jaunys, kai ari tuos, kuru autore ir poša Anna Babre. Taipoš muzejā globojās materiali par pošu sātu, tuos dzeivuotuojim, tyvuokuos apleicīnis ļaudim, vītom i nūtikšonom.