28. julī 18.00 Viļakys luterāņu bazneicā nūtiks Viesturiskūs vargaņu svātku “Latvija – ērģeļu zeme” koncerts “Sirds lūgšana”, kurā muzicēs Ilze Grēvele (soprans), Danuta Ločmele (baroka čells) i vargaņspēlis meistare Ilona Birgele (varganis). Kai informej Ilona Birgele, kas ir ari svātku muokslinīciskuo vadeituoja, Viesturiskūs vargaņu svātki nūteik vysā vaļsts teritorejā Latvejis symtgadis svineibu programys ītvorūs.

Koncertā skanēs J. S. Baha, G. F. Hendeļa, F. Mendelszona, F. Šūmaņa i M. Zariņa muzyka. Koncerta īvodlekcejā varēs dzierdēt vargaņu taiseituoja Alvja Melbārža stuostejumu ar interesantim, nadzierdātim faktim par Latvejis viesturiskajom varganem i vargaņu kulturu Latvejā. Tiks cyldynuoti latvīšu vargaņu taiseituoji, meistari, školuotuoji i komponisti, kurūs daiļrade i myužs ir veļteiti Latvejis vargaņu muokslai. Svātku ītvorūs varēs apsavērt Viļakys nūvoda školu muokslys izstuodi “Mana ērģeļu zeme”.

Ilze Grēvele ir liriskais soprans, absolvējuse J. Ivanova Rēzeknis Muzykys vydsškolys dirigiešonys i vargaņu spēlis klasi. 2016. godā tykuse pi bakalaura grāda J. Vītola Latvejis Muzykys akademejā, absolvejūt Senejuos muzykys katedru lektoris Airys Rūrānis klasē. 2015. i 2016. godā studējuse ERASMUS apmainis programā Hāgā, Nīderlandē, papyldynojūt sovys vokaluos prasmis pi pasaulī pīzeitu senejuos muzykys pedagogu. Ilze Grēvele bejuse vairuoku storptautysku meistarklašu dalineica Reigā, Dānejā, Itālejā. Pīsadalejuse vairuokūs baroka operu īstudiejumūs, ar izcylim panuokumim snāguse sovu solokoncertu Latvejā. Nu 2012. goda ir Baroka muzykys kora “Collegium Choro Musici Riga” muokslineica, storptautyskuo senejuos muzykys ansambļa “Le Vocidelle Grazie” (Nīderlande) soliste.

Danuta Ločmele čella spēlis pamatus vuicejusēs Zvejnīkcīma bārnu muzykys školā. J. Vītola Latvejis Muzykys akademejā 2008. godā tykuse pi bakalaura grāda klasiskuo čella spēlē pi profesoris Eleonorys Testeļecys, bet 2010. godā – pi magistra grāda baroka čella spēlē pi niu Šveicē dzeivojūšuos pasnīdziejis Ilzis Grudulis. Pīredze i instrumenta spēlis meistareiba tykuse izkruota, spielejūt i Latvejis koncertzalūs, bazneicuos i muižuos, i pīsadolūt vysaiduokūs muzykys festivalūs. Izgleiteiba tykuse papyldynuota meistarklasēs  Latvejā i aiz vaļsts rūbežu pi izcyluokajim senejuos muzykys interpretim. Nu 2010. da 2016. goda bejuse J. Vītola Latvejis Muzykys akademejis Senejuos muzykys nūdalis daaicynuotuo docietuoja.

Ilona Birgele, Viesturiskūs vargaņu svātku idejis autore i eistynuotuoja (bīdreiba muzykys aktivitatem “Pleno”), tykuse pi bakalaura grāda vargaņspēlē Ligitys Sneibis vadeibā, bet 2009. godā absolvējuse J. Vītola Latvejis Muzykys akademiju magistra studeju programā pi prof. T. Dekšņa. Papyldynuojuse zynuošonys Enshedis Muzykys konservatorejā, Storptautyskajā Vargaņu akademejā, Zalcburgā, Leipcigā, Hārlemā i cytur. Varganiste regulari muzicej Reigys Dūmā i Latvejis regionūs, atskaņojūt vērtini soloprogramu. Sasadorbuojuse ar korim i īvāruojamim solistim, snāguse koncertus Holandē, Šveicē, Vuocejā, Zvīdrejā, Čehejā, Krīvejā, Igaunejā i Lītovā, kai ari pīsadalejuse storptautyskūs vargaņu muzykys konkursūs i festivalūs.

Īīšonā koncertā par zīduojumim.