Itūreiz raidejums “Pi myuim Latgolā” gastej pi div jaunu, koloritu i aktivu damu: Ritys Gabrusānis i Kristīnis Seņkānis. Jūs kūpeigais hobijs ir muzyka, i niu Rita i Kristīne sovus muzykalūs talantus apvīnuojušys suleigā duetā ar nūsaukumu “Paprika”.

Rita Gabrusāne stuosta, ka piec gryutūs dorba dīnu veterinarajā klinikā “AnRiVet”, tīpat pa reizei nedeļā nūteik ari dueta “Paprika” mieginojumi, bet puorsvorā muziciešona nūteik Strūžānu pogosta kulturys centrā.

Kasdīnā Rita uorstej dzeivnīkus, sovpus Kristīne roda i eistynoj vysaidus projektus tepat Rēzeknis pusē. Rita jau nu pošys bierneibys beja nūlāmuse saisteit sovu dzeivi ar veterinara dorbu, deļtuo apzynuoti kruoja pīredzi, kab varātu atdareit sovu uzjāmumu itamā jūmā. Kristīne gon sapņuojuse byut i par dzīduotuoju, i astronautu.

Muzyka obejis damys saista jau ilgu laiku. Ritas i Kristīnes īsapasazeišona beja pavysam najauša. Vīna socialajūs teiklūs publicēja sovus skaņdorbus, sovpus ūtra vaicuoja sev kompanjonu. Rita i Kristīne komunicēt suoce socialajūs teiklūs, tod Rita paaicynuojuse Kristīni iz sasatikšonu pi seve klinikā. Ritys veirs asūt smiejīs, ka pyrmajā sasadzīduošonys reizē obejis asūt raudziejušys vīna ūtru puordzīduot. Niu duets “Paprika” draugus, rodus i cytus klausetuojus prīcynoj ar skaneigu izpiļdejumu i breineigom pošu sacerātom dzīsmem.