Latvejis Televizejis raidejums “Cytaidi latviskais” junī beja gostūs pi dzīsminīka, kulturys darbinīka i zemnīka Andra Eriņa saimis Rēzeknis nūvoda Drycānu pogostā. Eriņu i Andra muosys Anitys Vuorkalis saimis sasatikšonys īmaslys beja Andra mozdāla, meitys Agnesis dāla, raudzeibys. Raidejumā Andris Eriņš kūpā ar dālu Artūru stuosta ari par sovu zemnīku saimisteibu, Eriņu sātys saimineica Aina cap maizi, vysa leluo saime kūpā muzicej.

Nailgi pyrma raidejuma pyrmizruodis pieški myužeibā aizguoja Andra Eriņa meita Aija. Raidejuma veiduotuoji viestej, ka Aija paliks jūs atmiņā kai jauna i talanteiga sova nūvoda patriote, kaida jei satykta raidejuma fiļmiešonys reizē…