Pyrmūreiz nūtiks Storptautyskais folklorys deju festivals “Lipa kust”
Nu 22. da 26. augusta Zīmeļlatgolā nūtiks pyrmais Storptautyskais folklorys deju festivals “Lipa kust”, kurymā pīsadaleis folklorys kūpys nu Latvejis, Lītovys, Rumanejis i Slovakejis, daņču vokorūs, meistarklasēs i koncertūs paruodūt Eiropys tradicionalūs deju daudzveideibu.
Ideja taiseit festivalu rodusēs folklorys kūpys “Upīte” vadeituojim Andrim Slišānam i Ligitai Spridzānei gribiešonā redzēt doncojūšu Zīmeļlatgolu. Īdviesme, ka tys byutu taišni festivals, atguoja 2016. goda vosarā piec pīdzeivuotuo folklorys festivala Rumanejā, kas bejs cytaižuoks nakai īrosts Latvejā. Ceļš iz doncojūšu Zīmeļlatgolu ir bejs sūleiti pa sūleišam – pošim doncojūt, audzynojūt muzykantus, izdūdūt Zīmeļlatgolys daņču DVD i festivals ir kai logiskys turpynuojums aizsuoktajam dorbam. Planavuots, ka storptautyskys folklorys festivals Upeitē iz prīšku varātu nūtikt kotru ūtrū godu, eistynojūt ideju, ka pat vysatuoluokojūs vaļsts pakseišūs dažaidūs veidūs var aktivi dorbuotīs i justīs pīdareigs Latvejai.
Festivals tiks atkluots 22. augusta vokorā ar īsapazeišonys daņču vokoru Balkanu dobys parkā. Nuokušajā dīnā Upeitē paradzātys vysu dalinīkvaļstu prezentacejis, nu 24. augusta reitā Balkanu dobys parkā nūtiks daņču meistarklasis. 24. augusta vokorā Baļtinovā, Rekovā i Medņovā byus koncerti, nu festivals tiks nūslāgts ar koncertu Upeitē 25. augusta vokorā, kurymā pīsadaleis vysi tuo dalinīki.
Storptautyskajā folklorys deju festivalā “Lipa kust” pīsadaleis folklorys kūpa “Dubrava” nu Slovakejis, folklorys kūpa “Doina Rebrei” nu Rumanejis, tradicionaluos muzykys klubs “Vešeta” nu Lītovys, kai ari folklorys kūpa “Upīte”, folklorys kūpa “Rekavas dzintars”, folklorys kūpa “Egle” i etno kompaneja “Zeidi”.
Storptautyskais folklorys festivals “Lipa kust” itūgod byus ari daļa nu tradicionalūs Upeitis cīma svātku “Svātki Upītie”, kurymūs rādā festivalam byus ari tradicionaluos Latvejis teatru gasteišonys – 20. augustā nūsaverama Latvejis Nacionaluo teatra izruode “Zēns”, bet 26. augustā Dirty Deal Teatro izruode “Baltā grāmata”. Svātku golā – tradicionaluo nakts trase ar aizdavumim i puorsteigumim i grupys “Unknown Artist” koncerts-bals.
