Pavysam naseņ īvālāta jaunuo Latgolys planavuošonys regiona atteisteibys padūme. Da šam laikam tuos prīšksādātuoja beja Alīna Gendele, kurei beja ari Ludzys nūvoda pošvaļdeibys vadeituoja. Niu par padūmis prīšksādātuoju īvālāts Kruoslovys nūvoda pošvaļdeibys vadeituojs Gunārs Upenieks, sovpus juo vītnīka omotu ījiems Viļakys nūvoda pošvaļdeibys vadeituojs Sergejs Maksimovs. Raidejumā “Pi myusim Latgolā” Tenis Bikovskis sasatyka ar Alīnu Gendeli i Sergeju Maksimovu, kab dazynuotu vaira par Latgolys planavuošonys regiona funkcejom i prioritatem.

Latgolys planavuošonys regions izveiduots 2006. godā, kab nūdrūsynuotu regiona atteisteibys planavuošonu, koordinaceju, pošvaļdeibu i cytu vaļsts puorvaļdis īstuožu sadarbeibu. Latgolys planavuošonys regiona atteisteibys padūme puorstuov Latgolys pošvaļdeibu redzīni i interesis, organizej i voda ilgtermiņa atteisteibys planu i strategejis izstruodi i realizaceju, kai ari puorstuov Latgolys regiona interesis politiskā leiminī.

I Alīna Gendele, i Sergejs Maksimovs pastreipoj, ka juoturpynoj īsuoktais dorbs – juoroda labvieleiga vide investiceju pīsaistei, juosakuortoj infrastruktura, juoroda jaunys dorba vītys, kab mozynuotu dzeivuotuoju skaita sasamazynuošonu. Taipoš lels dorbs paradzams pi Latgolys Specialuos ekonomiskuos zonys. Alīna Gendele pastreipoj, ka itys ir laiks, kod Latgolys regionam eipaši juopīdūmoj pi kulturviesturiskūs vierteibu saglobuošonys. Sovpus Sergejs Maksimovs aktualizej sabīdriskuo transporta daīmameibys vaicuojumu.