Nu 24. da 26. augusta Leivuonā nūtiks ūtrais Myusu dīnu muokslys galerejis festivals, kas itūgod byus veļteits stykla temai, informej galerejis puorstuove Lāsma Vindule. Itūgod palīk 130 godu, kai Leivuonā nūtykuse stykla ražuošona, partū festivala mierkis ir veicynuot jaunradis procesus saisteibā ar senejuom Leivuona stykla tradicejom i veicynuot profesionaluos myusu dīnu muokslys daīmameibu plašai sabīdreibai Latgolys regionā.

Itys byus jau ūtrais Myusu dīnu muokslys galerejis festivals i ari itūgod tuo ītvorūs piļsātys dzeivuotuojim i gostim byus vareiba apmeklēt i pīsadaleit vysaidūs bezmoksys pasuokumūs – lekcejuos, meistardarbneicuos, performaņcēs, koncertūs i cytuos aktivitatēs.

Festivals 24. augustā 18.00 tiks atkluots ar stykla muokslinīka Arta Nīmaņa i fotografa Roberta Vīcupa personalizstuodem. Artis Nīmanis ir dizainers i stykla muokslinīks, zeimūla “an&angel” stykla trauku golvonais dizainers. Autora darbeibys fokusā ir ari monumentaluoki projekti – funkcionalys i dekorativys stykla dizaina detalis interjeram i arhitekturys objektim, ekskluzivys vitražys, apgaismis kermini un viersgaismys rysynuojumi. Arta Nīmaņa izstuode FRAGILE sajāmuse “Kilograms kultūras 2016” bolvu kategorejā “Vizualuo muoksla”. Bet fotografs Roberts Vīcups, kurs vaira kai 10 godu aizaraun ar dokumentalū foto i bejušuos PSRS viesturiskuo montuojuma fotodokumentaceju, Myusu dīnu muokslys galerejis festivalā pīduovuos sovu redzīni par bejušū Leivuona stykla ryupneicu. Piec izstuožu atkluošonys nūtiks lekceja/saruna ar muokslinīku Arti Nīmani.

25. augustā laukumā pi Myusu dīnu muokslys galerejis nu 19.00 da 21.00 sevkuram interesentam byus vareiba pīsadaleit bezmoksys zeimūgu i alternativuos fotografejis meistardarbneicā, kas radeita sadarbeibā ar Deer UV. Bet 21.00 tī nūtiks eipaši festivalam radeituo jaundorba “Dzīvā stikla simfonija” pyrmatskaņuojums. Muzykali audiovizualū prīšknasumu ir veiduojs muzikis Ivans Ustinovs i muokslinīks Raimonds Vindulis.

26. augustā 18.00 Myusu dīnu muokslys galerejā iz “Sarunu performances teritorijā” aicynoj kusteibu teatra muokslineica Muora Uzuliņa i multimedeju muokslinīks Armands Grundulis, bet festivalu 20.00 laukumā pi galerejis nūslēgs grupys “Dabasu Durovys” breivdobys koncerts.

Vysi pasuokumi festivala ītvorūs byus bez moksys.