Sastdiņ, 26. augustā, Latgolys viestnīceibā GORS nūtiks bungu i kuliņu grupys “Auļi” i etnomuzykys grupys “Tautumeitas” koncerts. Gaidūt sastdīnis koncertu, obeju grupu apvīneiba pīduovoj īsapazeit ar vēļ vīnu jaunuo albuma “Lai māsiņa rotājās!” dzīsmi “Aulejas klezmers”, kurā sasavynuse latgalīšu i ebreju tautys muzyka.

Kuliņu i bungu grupa “Auļi” i etno muzykys grupa “Tautumeitas” apsavīnuojušys kūpeigā projektā, kab radeitu kruošņu i unikalu muzykys programu “Lai māsiņa rotājās!”, kurā, 17 muzikim kuopūt iz skotivis, teik izspālāts i izdzīduots cylvāka dzeivē nūzeimeigais preceibu i kuozu pūsmys. Muzykys grupu “Auļi” i “Tautumeitas” sadarbeibai eistyn lykumsakareiga ir kuozu tema. “Auļu” kuliņu i bungu styprais skaniejums puorstuov veiriškū elementu, bet “Tautumeitas” (pats grupys nūsaukums jau ītver sevī kuozu tematiku – tautuos īšonu), ar izteikti maiguoku skaniejumu, tok gana jaudeigu daudzbalseigū dzīduošonu, puorstuov sīviškū. Taipat kai dzeivē jaunajam puoram piec kuozu ir juoīsavuica sadzeivuot, kab vīns nanūmuoktu ūtru, ari muzykā “Auļi” i “Tautumeitas” vaicoj saskaņu, vīns ūtru papyldynojūt.

“Aulejas klezmers” ir skaņdorbs, kurā sasavynuse Aulejis vokaluo daudzbaļseiba i Austrumeiropys ebreju tautys muzykys tradiceja. Nazkod dzīsmi, studeju vajadzeibom pietejūt Aulejis dzīduotuoju repertuaru, atroda “Tautumeitu” vadeituoja Asnate Rancāne. Dzīsme Aulejis sīvu repertuarā asūt bejuse vīna nu vysmozuok dzīduotuom, nu tūpūšajai etnomuzikologei cīši īsapatykuse, dalīkūt sovu aranžeju, dzīduota kūpā ar “Tautumeitām”, bet nu ir vīna nu “Lai māsiņa rotājās!” stuostim.

Grupu “Tautumeitas” Latgolys viestnīceibys GORS apmaklātuoji jau īpazynuši i caur Latgalīšu kulturys goda bolvu “Boņuks”, i apbolvuojumu “Laiks Ziedonim”, bet “Auļi” sastdiņ koncertzalā uzastuos pyrmūreiz. Koncerts Rēzeknē byus pyrmais nu apvīneibys treis koncertu rudiņa serejis Latvejis koncertvītuos – 29. septembrī koncertprograma “Lai māsiņa rotājās!” izskanēs Vydzemis koncertzalā “Cēsis”, bet 13. oktobrī Jelgovys kulturys nomā.

Beleti iz 26. augustā gaidomū koncertu atrūnami Latgolys viestnīceibys GORS i “Biļešu Paradīze” beletu sistemuos, kai ari latgalesgors.lv. Beletu cenys nu 12 da 19 eiro.