Ir nūsaslāguse pīteikumu pījimšona Nikodema Rancāna konkursam izcyluokajim Latgolys regiona padagogim, informej konkursa koordinatore Ilga Šuplinska. Nūslāguma pasuokums i uzvarātuoju paziņuošona 24. septembrī Viļānu kulturys nomā.

Nu 2. maja da 12. septembram varēja pīteikt lobuokūs školuotuojus par pārnuo goda sasnīgumim N. Rancāna bolvai. Itūgod ir sajimti 30 pīteikumi, kas ir leluokais pīteikumu skaits konkursa pastuoviešonys laikā. Lela prīca, ka ītūgod ir pīteikams pretendentu skaits nominacejā par veiksmeiguokū pedagogu debeju, partū ka īprīškejūs godūs itei nominaceja natyka padūta voi ari tī beja tik puors pretendentu. Jūprūjom leluokais pretendentu skaits ir divuos nominacejuos: par inovacejom izgleiteibys procesā i par latgalīšu volūdys populariziešonu.

Īsnīgtī pīteikumi ir nu 11 nūvodu (Rēzeknis, Ludzys, Baļtinovys, Bolvu, Rībeņu, Leivuona, Daugovpiļs, Dagdys, Ruguoju, Kruoslovys, Viļānu) i obom republikys nūzeimis piļsātom – Rēzeknis i Daugovpiļs. Puorstuovātais školu skaits ir vēļ leluoks – 27, storp tom i gimnazejis, vydsškolys, i profesionaluos školys, i pyrmsškolys īstuodis. Leluokū pīteikumu skaitu ir īsnīdzs Dagdys nūvods – vasali 5 pretendenti izvierzāti N. Rancāna bolvai.

Piec žurejis viertejuma tiks nūsacāti uzvarātuoji. Žurejā ītūgod ir puorstuovi nu vairuokom pošvaļdeibom, kas atbolsta N. Rancāna konkursu: Viļānu, Ludzys, Rēzeknis, Dagdys, Preiļu i Bolvu nūvodu izgleiteibys nūzaris puorstuovi viertēs N. Rancāna konkursu.

Nūslāguma pasuokums nūtiks 24. septembrī Viļānu kulturys nomā. Iz tū aicynuoti kai bolvys pretendenti, tai jūs vierzietuoji, atbaļsteituoji i sevkurs interesents. Uzvarātuojus gaida R. Cibļa veiduota eipašuo bolva – sudobra pakavsokta i cytys bolvys nu reikuotuoju Rēzeknis Tehnologeju akademejis, Latgalīšu kulturys bīdreibys i Viļānu nūvoda pošvaļdeibys. Školu puorstuovim jau tradicionali tiks duovynuoti jaunuokī izdavumi latgalīšu volūdā, tymā skaitā izdavums “Gostūs pi Boņuka”.

Pasuokums nūteik Kulturys ministrejis atbaļsteitā Latvejis symtgadis programys projektā “Latgolys kongresam 100”.