Latvejis Radejis Latgolys studejis veiduotais raidejums “Kolnasāta”sadarbeibā ar LaKuGu pīduovoj sevkuram puorbaudeit latgalīšu rokstu volūdys zynuošonys, uzrokstūt diktatu. Diktats skanēje 7. oktobra “Kolnasātā”, tū var nūsaklauseit ari zamuok īvītuotajā video, uzraksteitū var puorbaudeit LaKuGā. Diktatā fragmentu nu latgalīšu literatis Ilzis Spergys gruomotys “Dzeiveiba” skaita jaunatnis lītu specialiste Leila Rasima. Diktata teksts sastuodeits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus, pīļaunama divskaņa “uo” apzeimuošona ari ar “ō”.

Kuņdzeite ar peitu cysu capuri i trejom paveitušom rūzeitem ļumeigajuos rūkuos žieleigai nūsapyute, juos obejis ar draudzini beja apmaukušys mugorā zylys gūda suknis. Kuņdzeitei kostims beja nu gaiši zyla jauneibys dīnu krimplena, kas veilēs grumbuojuos i suonūs pat beja palaists valeiguoks. Redzēt jau daudz nikuo navarēja, tik tamuos vītuos drēbe beja drupeiteņ zyluoka nakai cytur. Tok, ka cīši nasavēre iz tūs veiļu, vēļ niule jei beja šmuka i labi kūpta buoba — blondi moti, sorkonys lyupys. Daguns to kai ogūrcs, a kas tī par gobolu redz. Kur lai vysim byutu tik smolki daguni, kab pi driebu dapasātu. Kaids beja, ar taidu i juodzeivoj. Ar tū pošu vīneigū dagunu jei beja nūdzeivuojuse lobu i kulturalu dzeivi — ka jau pat pi vacuma vēļ interesēja/iņteresēja (red. pīz. der obeji varianti) izīšona ļaudīs.

Lejupluodēt diktata tekstu PDF