DZEJA. Tāraudu Ingrida: “..ka var byut i tai”

DZEJA. Tāraudu Ingrida: “..ka var byut i tai”

Pīduovuojam skaiteituojim Ingridys Tāraudis jaunuokūs dzejūļus. Zynomajai latgalīšu dzejneicai dreizumā gaidama ari gruomota “Bisers zam kuoju/Pērlītes zem kājām”.

***
tu navaicoj manis kur pazuda
pādejais spaits
aiz tuo zora i smylgu daņčūs
tevi mīļuoju puori sirds lylumam
puori laikam i nūlikteibai
niule cytus ceļus īsim
i dzaltonys pārkiunis pārkiuņuos
tai vajag

 

***
..rudiņa nūkruosu pylnys
leita lasis
leist leist leist
aiz mašynys lūgu
gleznu reprodukcejis
kolnu viersyuņu i da i na
kuopt pa i nu

 

**
muokuli daradynuoti
kai pyukalaini luoceiši
aiz manis

tyvuok tyvuok
zamuok zamuok
bolti bolti
ar palāku traipu pa vydu

dasaucu tevi breinumus
vērtīs
pajimt dalnuos i sapyust elpā
iz vysu pušu

nikas tovuos skrūpstuos
nanūtreis

 

***
..symtu godu
maņ navajag
itūs rūbežu
nu punkta da punktam
gaisa burbuļūs
pazyud muna
tārauda piļs
vysūs krostūs nīdris i
bryungonys putys
a maņ puļts rūkā
iz serialu

 

***
dzaļvēdere
puorsalīkuse puori dabasim
īmārcu ūtu pa reizei kotrā
kruosā

i zeimoju

cik dimenseju iraida
muns
pasauļs

kod puori vysom kruosom
sorkons

 

***
ituos šaļts leita
zeimeituos karikaturys
iz myusu dzeivem
iz kurom divi
salejuši verās
nu tuo kvartala mozaikys
taiseisim sovu kvartalu
bez lineju

 

**

sorkuonuo reita sorkuonuo sukne iz spīgeļa puorsvīsta
krelleišu sabyrums boltā vuškys
vylnys pakluojā
sorkonom rūžlopom pylns koridors
īīsme munā telpā
klasika – sorkons ir jutekleigi

a potograpejis
nasalīc
škārsteiklā

 

***
storp buļbu cepšonu i greidys mozguošonu
dyuc telepons doncojamdzīsmi
bārns capumus drupynoj
i zeimoj ar dzaltonu lidmašinys

leidzsvors vysam
kas prioritars

 

***
dzeiveiba trausla
pučainu aizkoru aizkluots
pasauļa redziejums
vysuma maluošona
par zvaigžņu spēlem
sytās kai nagudra
sirds

aizkors pa viejam
izkaisa pučis

 

***
storp myusu krostim
ašņainu pierstu izravātys
puču dūbis
tvaneigi i tumneigi
pa rudini zīd


putynu sasasaukšona
aizlauztu spuornu i viejam pasaļaušona
laiki
kod būreibu vuordim datorā
suoksīs myrguojums

atminiesi mani
tymā krostā

 

***

jei roksta
ilgi kai auž kruosainu deči
kū puorsegt puori laikim
par pilim i vylynuojumu
nanūbyrdynuot muokulim zaltuotuos
malenis
paslēpt sauvē tevis īdūtū meža zemneicu
i sataupeit vosorys smaržys

sirdī laiskavojās
naticeiba breinumam
ka var byut i tai

dzaltonā pīniņu pļovā
dzaltons saulis suņs

 

***
lilejis burkā
pi atvārta lūga

zaļš nakauneigs pavasars
aiz

kleitys pūdzeņu
najauša nūbyrzuļuošona

placi bolti

atsaver vyss tu maņ

 

***
Latgolys ceļu
smiļkšainuos linejis
kur kaids dzeiveibys punkts

tuoli teirumu vydā
īauguse ar suopeigim
īguodu laikim
sāta

kai talismans

 

Karteņa: momenti.lv (Anita Austvika)

Kalenders

Mar
19
Tre
11:00 Nūvodpietnīceibys piecpušdīne pa... @ Kuorsovys piļsātys biblioteka
Nūvodpietnīceibys piecpušdīne pa... @ Kuorsovys piļsātys biblioteka
Mar 19 @ 11:00 – 12:30
Rakstnīka Jezupa Laganovska 105. jubilejam veļteita nūtikšona.
12:00 Izstuodis “Paātrinājums” atkluošona @ Jaunbyuvis biblioteka
Izstuodis “Paātrinājums” atkluošona @ Jaunbyuvis biblioteka
Mar 19 @ 12:00 – 13:00
Sagaidūt nūzeimeigu latvīšu gruomotnīceibys jubileju – pyrmuos īspīstuos gruomotys latvīšu volūdā pīcsymtgadi – Daugovpilī, Latgolys Centraluos bibliotekys filialē Jaunbyuvis bibliotekā, nūtiks ceļojūšuos izstuodis “Paātrinājums: latviešu grāmatniecības īsais ceļš no aizbildniecības līdz patstāvīgai nozarei 19. gadsimtā”[...]
17:00 Izstuodis “Baba, kurū škārsteikl... @ "New East"
Izstuodis “Baba, kurū škārsteikl... @ "New East"
Mar 19 @ 17:00 – 18:30
Baba ir Latgolys fenomens, kura oda zečis, skaita gazetys, marinej konservus zīmai, slauc gūvs i iz pīna golda nūdūd pīnu, ravej duorzu, cap špeka peirāgus i dora cytys lītys, kū babys parosti dora. Tok taidys[...]
17:30 Ture izstuodē “Gleizds, šķēres, ... @ Paula Stradiņa medicinys viesturis muzejs
Ture izstuodē “Gleizds, šķēres, ... @ Paula Stradiņa medicinys viesturis muzejs
Mar 19 @ 17:30 – 19:00
Muzeja pietneica – socialantropologe Anna Žabicka sovā stuostejumā par izstuodi pīsavērss veirīša (male gaze) i medicinyskajam (medical gaze) skatīņam iz sīvīti kai Gleizda muokslys, tai dokumentalajuos fotografejuos, kas beja nasaraunamai saisteitys ar juo dzeivi i[...]