Latgolys viestnīceibys GORS Muokslys galerejā 1. novembrī 16.00 tiks atkluota riezeknīša, vīna nu Latgolys īvāruojamuokajim muokslinīkim Osvalda Zvejsalnieka personalizstuode “Pašportrets. Personība studijās“, kurā apsaveramuo gleznuotuoja dorbu retrospekceja ļaus īpazeit na tik poša muokslinīka, nu ari Rēzeknis piļsātys portretu pusgodsymta garumā, informej Latgolys viestnīceibys GORS puorstuove Kristīne Caune.

Osvalds Zvejsalnieks gondreiž 50 godu ir saisteits ar Rēzekni i, kai skaita juo daiļradis pietneica muokslys zynuotneica Ingrīda Burāne, bez Osvalda Rēzekne byutu pavysam cyta piļsāta – īspiejams, tamā nabyutu vīnys nu lobuokuom muokslys vydsškolom Latvejā, nabyutu spieceigys muokslinīku grupys ar kvalitativom izstuodem, nabyutu Latvejis Muokslys akademejis filialis. Itū uzskaitejumu varātu turpynuot vēļ i vēļ. Eistineibā vyss, kū Zvejsalnieks gleznuojs saisteibā ar Rēzekni, ir juo dzeivis pašportrets, nu piļsātys i tuos cylvāku gleznuojumūs muokslinīks roda Rēzeknis portretu.

Izstuodē Latgolys viestnīceibā GORS byus apsaverama muokslinīka dorbu retrospekceja, suocūt ar 70. godūs radeitu da pošu jaunuokūs gleznuojumu. Izstuodē varēs redzēt gleznu “Zvejsalas” (1988), kur muokslinīks portretējs sovus vacuokus, palākā kruosu gammā īturātū “Krasta iela Rēzeknē” (1983), ari autobiografiskū dorbu “Studijās” (1976). “Nazynu nivīnu cytu pīmāru Latvejis muokslys viesturē, kod taidā skaitā i taidā kvalitatē pusgodsymta garumā tyktu īmyužynuota vīnys piļsātys ainova – bazneicu tūrņu vertikalēs, rakstureigūs nameņu senatneigumā, aizeimūšūs vierteibu dramatismā, zīdūšūs duorzu skaistumā i vysā tymā laika ritiejuma pīsuotynuojumā, kas nu Osvalda Zvejsalnieka paletis kluojīs iz audaklu, kab saglobuotu sovu dokumentalitati i emocionalitati puori laikam i kasdīneibai,“ soka Ingrīda Burāne.

Osvalds Zvejsalnieks (dz. 1944. goda 21. martā Varakļuonūs) 1971. godā beidzs Latvejis Muokslys akademeju (LMA), nu 1976. goda ir Latvejis Muokslinīku savīneibys bīdrs. Nu 1970. goda struodoj Rēzeknis lītiškuos muokslys vydsškolā, itūšaļt – Rēzeknis Muokslys i dizaina vydsškolys direktors, LMA profesors. Osvalds Zvejsalnieks izstuodēs pīsadola nu 1971. goda, sareikuojs ap 20 personalizstuožu, regulari pīsadola plenerūs i grupu izstuodēs i Latvejā, i uorvaļstīs.

Izstuode “Pašportrets. Personība studijās“ Latgolys viestnīceibys GORS Muokslys galerejā byus apsaverama nu 1. novembra da 8. decembra kotru dīnu nu 11.00 da 20.00, īīšona bez moksys.