25. oktobrī 87 godu vacumā myužeibā aizguojs Tiļžys draudzis pravests, aktivs sabīdryskais i kulturys darbinīks, nūvoda viesturis apzynuotuojs Alberts Budže, informej Rēzeknis-Aglyunys dieceze. Bēru dīvkolpuojums nūtiks sastdiņ, 28. oktobrī, 11 stuņdēs Tiļžys Rūmys katuoļu bazneicā.

Alberts Budže dzims 1930. goda 26. janvarī Reigā. Juo dzymdynuotuoji Donats i Tekle bejuši nu Leivuona pusis i iz Reigu puorsacāluši piec 1. pasauļa kara. Alberts Budže dzims i izaudzs religiozā saimē. Vuicejīs G. Merkeļa 20. pamatškolā i Reigys 1. vydsškolā. Piec vydsškolys beigšonys 1949. godā suocs struoduot Reigys gruomotu antikvariatā, nu 1952. godā, kod tikū attaiseja Goreigū seminaru, izsuocs tymā vuiceibys. 1957. goda 30. majā veiskups Pīters Strods īsvietejs jū par prīsteri. Kolpuojs Reigys Sv. Ontona bazneicā, Majuoru, Slūkys, Kemeru, Preiļu i Rībeņu katuoļu draudzēs. Nu 1991. goda kolpuojs Tiļžys i Ruguoju draudzēs, prīsteru nabyušonā kluotyn jis ir apkolpuojs ari Kryšānu, Škilbānu i Baļtinovys draudzis.

Albertu Budži aizruove nūvoda kulturviesturis i pasauļa nūtikšonu sakareibu vaicuošona, jis ir pietejs dominikaņu, jezuitu i cytu goreigūs ordiņu darbeibu Latgolā, Latgolys vītvuordu saisteibu ar cytu vaļstu vītvuordim, savuocs materialus i pīrakstejs aprokstus par īvāruojamim i aizmierstim prīsterim, sasadorbuojs ar Bolvu pusis kulturys īstuodem, gatavejs aktualus puorskotus i pīsadalejs ar tim nūvodpietnīceibys konfereņcēs. Pravests Alberts Budže par kulturpietnīciskū i sabīdryskū darbeibu apbolvuots ar Latvejis Republikys Kulturys ministrejis Atzineibys rokstu (2000), kai ari sajiems Latgalīšu kulturys goda bolvu “Boņuks 2015” par myuža īguļdejumu latgalīšu kulturā.

Myužeigū mīru dūd jam, Kungs, un myužeiguo gaisma lai atspeid jam.