Nu 2017. goda apreļa da novembra bīdreiba “Latgolys Studentu centrs” (LgSC) eistynoj jaunīšu iniciativu projektu “Dubnys pīRoksti”, kuruo laikā tyka organizāts laivu braucīņs — ekspediceja. Projekta mierkis beja apvīnuot Daugovpiļs, Leivuona, Preiļu i Vuorkovys nūvodu jaunīšus, izmontojūt dažaidys vuiceibu metodis, pieteit Dubnys upi i tuos apleicīni, taidā veidā veicynojūt jaunīšūs lokalpatriotismu, pylsūniskū iniciativu i leidzdaleibu.

Vosorys suokumā jaunīši devēs laivu braucīnī pa Dubnys upi, sasatyka ar tuos krostūs dzeivojūšajim ļaudim, īpazyna tī asūšūs kulturviesturiskūs objektus, atrūnamūs augus i pieteja Dubnys upi nu geografiskuo, geologiskuo, vidis vīdūkļa.

Apkūpojūt ekspedicejis laikā īgiutū informaceju, intervejis, video i foto materialus, jaunīši izveiduojuši kinu, kurā paruodeiti Dubnys krostūs asūšī kulturviesturiskī objekti i pīkrastē dzeivojūšūs cylvāku dzeivisstuosti. Projekta laikā izveiduota ari fotoizstuode ar spylgtuokajom ekspedicejis šaļtim, dobu i cylvākim, kai ari sovpateiga lelformata karte, kurā paruodeits Dubnys upis teciejums, nūzeimeiguokī objekti pīkrastē, kai ari dzeivinīki i augi, kas sastūpami upis gultnē i krostūs.

Bīdreiba “Latgolys Studentu centrs” sevkuru aicynoj iz sasatikšonu ar projekta “Dubnys pīRoksti” dalinīkim 1. novembrī 14.00 Špogu vydsškolā, 4. novembrī 16.00 Preiļu jaunīšu centra “Četri” telpuos, 8. novembrī 18.00 Leivuona jaunatnis i iniciativu centrā “Kvartāls”, kai ari 15. novembrī Vuorkovys nūvoda Kulturys centrā, kur tiks prezentāta projekta laikā izveiduotuo kina, fotoizstuode i karte.

Naatsveramu īguļdejumu projekta eistynuošonā devs Vyšku pogosta jaunīšu centrs, Leivuona jaunatnis i iniciativu centrs “Kvartāls”, Preiļu jaunīšu centrs “Četri”, kai ari Vuorkovys nūvoda jaunīši. Eipašs paļdis par finansialū atbolstu Latvejis Republikys Kulturys ministrejai i Dīnvydlatgolys NVO atbolsta centram.