Svātdiņ Rēzeknē nūtiks labdareibys koncerts
Svātdiņ, 5. novembrī, 11 stuņdēs Rēzeknis kulturys nomā (Bruoļu Skryndu īlā 3) nūtiks labesteibys koncerts “Atver savu sirdi”, informej bīdreibys “Eņģeļi ar mums” puorstuove Inese Muhamberga. Bīdreiba kotru godu reikoj itaidu koncertu, aicynojūt atbaļsteit Rēzeknis piļsātys i nūvoda bārnus ar eipašom vajadzeibom, kurim ratuos slimeibys līdz tuoluoku fiziskūs, volūdys, kusteibu i cytu vasalam cylvākam tik pošsaprūtamu i napīcīšamu īmaņu atteisteibu.
Koncertu atbolsta i tymā pīsadaleis klavesīniste Ieva Saliete, Puncuļu saime, Inga i Normunds, Rēzeknis kapela “Dziga”, Rēzeknis videjuos paaudzis deju kolektivs “Dziga”, “Ziemassvētku muzikālā apvienība”, grupa “Trešīs Ņutona Lykums”, Lidija Zaičenko nu Daugovpiļs, sporta deju klubs “VIVA”, deju studeja “STOPTIME Dance Studio”.
Bīdreibā “Eņģeļi ar mums” ir apsavīnuojušys saimis nu Rēzeknis i nūvoda, kas audzynoj bārnus i jaunīšus ar eipašom vajadzeibom. Bīdreibā cyts cytu atbolsta i kūpā vaicoj vareibys, kab pozitivi ītekmātu i maineitu sovu i bārnu dzeivis kvalitati.
Īīšona koncertā par zīduojumim. Zīduot var ari iz kontu LV06HABA0551034335290, bīdreiba “Eņģeļi ar mums”, reg. Nr. 40008169258
