14. novembrī 14.00 Latgolys Kulturviesturis muzejā (Atbreivuošonys alejā 102, Rēzeknē) nūtiks tradicionaluo Viesturis šaļteņu pītura, kura itūreiz veļteita tematam “Rēzeknis Pīna konservu kombinatam – 60”, informej muzeja eksperts kulturviesturis vaicuojumūs Kaspars Strods.

Piec Ūtruo pasauļa kara, nūsastyprynojūt padūmu varai, Latvejā nūtyka intensivs industrializacejis process, kura rezultatā izcēle vairuokus ryupnīceibys uzjāmumus. Rēzekne palyka par vīnu nu LPSR ryupnīceibys centrim. Leluokuo daļa nu uzjāmumu tyka izcalti jaunizveiduotajā Zīmeļu mikrorajonā. Tūs vydā beja 1957. godā ražuošonu suokušais Rēzeknis Pīna konservu kombinats. Dreiži viņ tys palyka par leluokū uzjāmumu Rēzeknis piļsātā, kai ari īvāruojamuokū pīna puorstruodis ražūtni vysā Latvejis teritorejā. Kombinata produkceja beja īcīneita na tik Latvejis teritorejā, bet ari tuoli aiz tuos rūbežu. 2001. godā finansialu problemu deļ ražūtnis darbeiba tyka apturāta.

Itūgod palīk 60 godu nu kombinata darbeibys suokšonys, partū Latgolys Kulturviesturis muzejs aicynoj īsavērt uzjāmuma viesturis puslopuos kūpā ar Rēzeknis Pīna konservu kombinata viesturis pietnīku Artūru Āboliņu. Pasuokumā laikā byus apsaverama uzjāmuma darbeibai veļteita ekspresizstuode.

Īīšona pasuokumā – bez moksys.

Artūra Āboliņa rokstu par Rēzeknis Pīna konservu kombinata viesturi var skaiteit ite.

Karteņā: RPKK bārnuduorza bārni “rūtaļu veikalā”, 1970. godi. Karteņa nu Latgolys Kulturviesturis muzeja kruojuma.