Nuokušajā godā minimalū olgu planavuots palelynuot nu 380 eiro iz 430 eiro. Tok uzjiemieji i daļa Saeimys deputatu izruoda naapmīrynuoteibu, vysvaira par situaceju Latgolā. Kab dazynuotu vaira, iz sasatikšonu ar uzjiemiejim i  Saeimys pīprasejumu komisejis sēdi devēs Tenis Bikovskis.

Diskuseja storp uzjiemiejim i deputatim aizasuoce 13. oktobrī, kod Latgolys uzjiemieji beja paaicynuojuši nu Latgolys īvālātūs Saeimys deputatus iz sasatikšonu i lyudze ceineitīs pret minimaluos olgys ceļšonu, tuo vītā panuokūt, kab tyktu palelynuots ar nūdūkli naaplīkamais minimums. Tys nūzeimej, ka Latgolys cylvāki nasajimtu mozuoku olgu kai cytūs regionūs i reizē nabyutu napanasams nūdūkļu slūgs uzjiemiejim.

Deputats Jurs Viļums vysaktivuok īsasaisteja puorrunuos ar uzjiemiejim. Jis kūpā ar vēļ devenim Saeimys deputatim īsnīdze Saeimys pīprasejumu komisejis izskateišonai prīšklykumu par minimaluos olgys apjūma tik strauju napalelynuošonu, palelynojūt ar nūdūkli naaplīkamū minimumu.

Piec spraigom diskusejom Saeimys pīprasejumu komiseja itū Jura Viļuma īrūsynojumu nūraideja.