Nu 17. novembra da 28. februara Šmakovkys muzejā Daugovpilī teik pīduovuota vareiba apsavērt bīdreibys “Latgolys Studentu centrs” veiduotū fotoizstuodi “Kas Tev ir Latveja?”, kurā kotra karteņa ir naatkuortojams stuosts par nūzeimeigom Latvejā pīdzeivuotom šaļtim i nūtikšonom.

Īskandynojūt 99. Latvejis dzimšonys dīnu, Šmakovkys muzejs aicynoj īpazeit i izbaudeit Latgolys kulinarū montuojumu, īsavērt Latgolys i Daugovpiļs viesturis puslopuos, kai ari īpazeit myusdīneigu redzīni par pīdareibu sovai vaļstei i regionam.

Novembris ir svātku mieness na tik Latvejai, bet ari bīdreibai “Latgolys Studentu centrs”. Veicynojūt pylsūniskū apziņu i lokalpatriotismu, 2015. godā bīdreiba organizēja foto konkursu “Myusu Latveja”, kurā bīdri, draugi i interesenti tyka aicynuoti īsyuteit kartenis, kas paruoda kotra autora pīdareibys sajiutu sovai vaļstei i regionam. Konkursa rezultatā tyka izveiduota fotoizstuode, kura godu laikā apceļuojuse Latgolys pošvaļdeibu kulturys īstuodis, bet itamā zīmā byus apsaverama Šmakovkys muzejā Daugovpilī.

Šmakovkys muzeja telpys itūgod papyldynuotys ar jaunim objektim. Muzeja apmekliejumu sevkurs var īmyužynuot pi jaunuo fotostenda, sovukuort jaunajā gostu kartē vysi var atzeimēt vītu, nu kuruos atbraukuši. Juodasoka, ka muzeja pastuoviešonys laikā tī gastejuši turisti nu vaira kai 30 pasauļa vaļstim.