Vītvuords ir vīns nu spylgtuokajim kulturvidis raksturuojumim. I svareigi ir atguoduot, ka mes asam pīdereigi vītai, kuru saucom par sātu. I kotra vīta nas sovu ideņtitati, stuostu i nostu. Mes asam pīdereigi sovys dzymtys saknem.

2017. goda vosora bīdreibai “LOBS” beja gona darbeiga. Kai vīns nu leluokajim i nūpītnuokajim dorbim beja projekta “Vītvuordu stuosti Latgolā” realiziešona kūpā ar Naujinis jaunatnis i sporta centru i Kuorsovys jaunīšu centru “Pūga”. Kūpā mes aizsuocem puornūvodu filmiešonys maratonu.

Tai kai bīdreiba struodoj ar jaunīšim i vīns nu dorba reikim ir video filmiešona, tod roduos dūma, ka varātu apvīnuot treis lobys lītys: jaunīšus, kulturu/viesturi i video.“Vītvuordu stuosti Latgolā” mierkis ir vītvuordu kai kulturvidis objekta saglobuošona i informacejis virziešona, veicynojūt paaudžu saikņu styprynuošonu. Dorba gaitā tyka filmāti treis nūvodi: Rēzeknis, Daugovpiļs i Kuorsovys, intervātys 11 personeibys i vēļ vaira tyka dzierdāti vītvuordu stuosti. Juodasoka, ka video tyka atspīgeļuoti na vysi stuostnīki, jū, veidojūt gola rezultatu, beja juoizveidoj sasaisteits i satureigs stuosts.

Plošais stuostu kruojums pīruodeja mums tū, ka var pieteit cīši daudz vītu nūsaukumu i uzvuordu. Prīca beja par tū, ka ari pošai dorba grupai projekta gaitā roduos padzilinuota interese par Latgolys viesturi. Kai izaruod, ir daudz vaira, kū pastuosteit i paruodeit, kū varātu atspīgeļuot jau dokumentalejā kinā par vītvuordim i uzvuordim Latgolā. Mes itūreiz orientejomēs iz tū, lai jaunīšam, verūtīs video, nagaistu interese i jis nūsavārtu video da gola.

Projekts tyka realizāts ar Latgolys regiona atteisteibys agenturys, Vaļsts kulturkapitala fonda i A/S “Latvijas valsts meži” finansialu atbolstu.

Roksta autore: Ingūna Semule, bīdreiba “LOBS”