Ir suocīs jauns gods, kas kai ar Zīmyssvātkim, tai ari jauna godalaika īsastuošonu, aizness paceli rudiņa nostalgeju. Taišni ar taidu nūskaņu klauseituojus uzrunoj Egils Kulmanis ar skotuvis vuordu Eggyman i latgalīšu dzīsmineica Laura Bicāne. Obeju kūpdorbs “Suopis” ir dziļu attīceibu stuosta škārsgrīzums. Cīlvāki īsapazeist, sasatyvynoj, izīt cauri ari škieršonuos šaļtim i attuolumam. Tok caur ituom suopem īsamirdz acs, deļtuo, ka laiks dzīdej bryucis i stuostam daīt jauns suokums.

Egils Kulmanis ir zynoms kai grupys “Dabasu Durovys” tausteņnīks, bekvokalists i ar muzyku nūsadorboj nu grupys pyrmssuokumu. Grupa ir izlaidusi četrus studejis albumus “Lepetnīks” (2008), “Styklu Vītā Skaņa” (2012), “Bāka” (2014), “Pādys Runoj” (2016), nu kurūs dzīšmu leluokuo daļa ir latgalīšu volūdā. Grupa turpynoj rodūši dorbuotīs i paraleli dorbam grupā rūnās ari jaunys idejis.

Laura Bicāne aktīvi muzicej jau vairuokus godus, izlaiduse treis studejis albumus “Es tikai ļaujūs” (2013), “Trīspuksti” (2015) i “Lauzīsimies cauri pūlim” (2017). Laura dzīd i spielej gitaru, akordeonu, sasadorboj ar cytim muzikim dažaidūs projektūs. Paguojušajā godā īstyurējuse lauleibys ūstā, kas, prūtams, nas dažaidys puormainis dzeivē. Muzykalū karjeru Laura turpynoj veiduot i sūla sovim fanim jaunus rodūšus panuokumus.

Muziki aicynoj īsaklauseit stuostā “Suopis” i puorvarēt sovus puordzeivuojumus, kas taišni kai itamā dzīsmē tok nas jaunu cereibu i lobys puormainis.

Dzīsmis īrokstā pīsadaleja Egils Kulmanis, Laura Gutjeresa-Kamačo (Bicāne), Romāns Sladzis. Īroksts radeits Daugovpilī, sātys studejā, 2017. godā. Miksēja i māsterēja Egils Kulmanis.