Itamā sastdīnē, 20. janvarī, 18.00 Latgolys viestnīceiba GORS aicynoj iz sirsneigu koncertstuostu par Jetti Užāni – legendarū Cymdu Jettiņu. Stuostu atkluos Jettis myuža gaitu i dorbu zynuotuoja Elīna Apsīte, bet izspielēs klavesiniste Īva Saliete. Koncertstuosts byus pyrmuo nūtikšona nu itūgod paradzātuo koncertcykla “Savējie”, kurā GORS puļcēs muzikus i cytu žanru muokslinīkus, kurūs dzymtuo puse, dzeivisvīta ir voi ir bejuse Latgola, informej Latgolys viestnīceibys GORS puorstuove Edeite Husare.

Koncertstuostā “Jettes Dienu grāmata” sasaveis Elīnys Apsītis skaiteituos Jettis dīnysgruomotys puslopys i klavesinistis Īvys Salietis, kura tikū sajāmuse nominaceju Lelajai muzykys bolvai 2017, izspālātī latvīšu komponistu, Riharda Dubrys i Pītera Vaska, i pasauļa klasiku, Johana Sebastiana Baha i Fransuā Kuperēna, skaņdorbi. Piec koncertstuosta sevkurs grybātuojs teik aicynuots iz sarunu ar Elīnu Apsīti i Jettis Užānis rūku i sirds syltuma darynuojumu – cymdu – izstuodi. “Gribu Latveju īpazeistynuot ar Jetti, kaidu es jū satyku juos pošys dīnysgruomotuos, ar trauksmainu, dzeivis olku puorpylnu jaunu sīvīti tai laikā, pyrma jei palyka par sevi pīpiļdejušu, tautā mīļuotu Cymdu Jettiņu. Muna korstuokuo vieliešonuos ir, kab Jettis Užānis myužs i padareitais tyktu saglobuots tautys atmiņā, kab Jettinis unikaluo cymdu adeišona – gobelena veiduošonys tehnika – tyktu saglobuota Latvejis cymdu adeišonys viesturē i juos dzeivisstuosts mums aplīcynuotu latviskū variešonu,” tai par Jettis atstuotajim pādim Latvejis kulturā i tūs saglobuošonu soka Elīna Apsīte.

Jette Užāne beja muokslineica, cymdu adeituoja, filozofe, sīvīte, kura vysu sovu dzeivi pavadejuse invalidu rateņūs i uzvarējuse liktini, lykuse tam smaideit, kod bejs skumeigai, i smītīs, kod bejs gryuši. Jette Užāne vysu sovu myužu pavadeja Dzērbenis pogosta “Lejnieku” sātā, ar sovu dzeivis filozofeju i cymdu adeišonys prasmi īinteresādama daudzus Latvejā i pasaulī dzeivojūšus kulturys cylvākus. Cymdu Jettiņa, kai jei poša sevi saukuse, bejuse ari VKKF myuža stipendiate, Treju Zvaigžņu ordiņa sajiemieja. 2007. godā Jette dīvamžāļ aizguojuse myužeibā, niu ļaujūtīs dzeivuot sovu adeitūs cymdu rokstūs, gruomotuos i ari koncertstuostā.

Koncertu cykls “Savējie”, kura pyrmuo nūtikšona gaidama jau 20. janvarī, 2018. godā Latgolys viestnīceibā GORS puļcēs i muzikus, i cytu žanru muokslinīkus, kurūs dzymtuo puse, niulejuo dzeivisvīta ir voi sova laika dzeivisvīta ir bejuse Latgola. Taidā veidā GORS, svietejūt nu jau pīktū darbeibys godu, piļdeis sovu Latgolys viestnīceibys miseju – stuosteit Latgolys stuostu, atbaļsteit nu Latgolys guojušūs muzikus i muokslinīkus, veicynuot jaunradi. Itūgod Latgolys viestnīceibys GORS “Savējie” nūtikšonuos varēs sasatikt na tik ar klavesinisti Īvu Salieti, bet ari ar čellisti Ilzi Gruduli, varganisti Ivetu Apkalnu, Rēzeknis kamerorkestri dirigenta Juoņa Stafecka vadeibā i cytim muzikim i muokslinīkim, reizē cerejūt, ka koncertu cykls raiseis vys jaunys idejis i rodūšuos sadarbeibys programys.

Koncertu cykla nūrisi atbolsta Rēzeknis piļsātys dūme i Vaļsts kulturkapitala fonds. Beleti iz 20. janvara koncertu atrūnami Latgolys viestnīceibys GORS i “Biļešu Paradīze“ beletu tierdznīceibys sistemuos, beletu cena 7,00–9,00 eiro, GORS Kulturys viestnīku programys dalinīkim 10 % atlaide.