Internetā publicāti Latgolys senuokuos daeinamuos dvieseļu revizejis – Rēzeknis starastejis 1772.g. revizejis materiali, kas ir vierteigs olūts Latgolys dzymtu viesturis pietnīkim.

Laikā nu 1772. goda septembra leidz decembram veiktuo revizeja teritoriali ītvēra Inflantejis kņazistis Rēzeknis starasteju – vāluokuo Rēzeknis apriņča leluokū daļu. Krīvu volūdā raksteitī dvieseļu revizejis akti i pyrmais raksteitais olūts, kurā snāgtys zinis par samārā lelys Latgolys dalis vysu īdzeivuotuoju vacumu, saimis saitem, dzeivisvītu, migraceju, kai ari natīšys zinis par īdzeivuotuoju tauteibu i nūsadorbuošonu.

Elektroniskū publikaceju sagatavejs viesturis magistrs Agris Dzenis, tei daeinama latgalesrevizijas.wordpress.com.

“Prūtams, tei vēļ ir tuoli nu ideala, ir tikai 18. g.s. krīvu rūkroksta atšifriejums myusu dīnu kirilicā. Vajadzeigi komentari, tulkuojumi i ārtuoka mekliešonys sistema, kū raudzeišu izveiduot i pylnveiduot nuokūtnē. Tūmār jau itūšaļt uzadreikstu cerēt, ka olūts daudzim paleidzēs sovys dzymtys sakņu mekliejumūs,” sovā profilā Facebook.com roksta idejis autors Agris Dzenis.