Roksta autore: Madara Zalāne, Gaļānu pamatskūlys 8. klase

26.janvarī, pīmynūt 1991. goda barikažu laika viesturiskūs nūtykumus, myusu skūlā nūtyka konkurss 5.-9.klašu skūlānim “Erudits”.

Pirms konkursa mums beja interesanta tikšonuos ar žurnalisti Marutu Latkovsku, kura latgaliski ir puorlykuse rakstnīka Kārļa Skalbis puorsoku “Kaķīša dzirnavas”- “Kačeiša patmalis”. Jei mums pastuosteja par dorbu ar tekstu, par sadarbeibu ar muokslineicu Ievu Jurjāni, kura ir jaunuo izdavuma zeimiejumu autore. M.Latkovska īsaceja ari mums vuicētīs latgalīšu rokstu volūdu, ruodeja vuiceibu materialus, kuri var byut lobi paleigi itymā dorbā. Myusu skūlys biblioteka niu byus boguotuoka ar vēļ vīnu gruomotu – K.Skalbis puorsoku “Kačeiša patmalis”. Paļdis par duovonu!

Konkursam “Erudits” veiduojom komandys, gatavejom sātys prīšknasumus. Konkursu vadeja skūluotuojis Rita Upeniece i Anna Kupre. Konkursa suokumā tyka izvārtātys sajiutys: „maņ vyss vīnolga”, „jiutūs breineigi”, „ceru izzynuot kū jaunu”, „jiutu namīru”. Konkursā beja juoīveic 9 aizdavumi. Pyrmajā vajadzēja atpazeit ekranā radzamūs objektus – gon myusu pogostā asūšūs, kai Vydsmuižys bazneica, Gaļānu parks, Ūšupis muiža, gon cytur asūšūs, pīm., Mārys pīmineklis, Rundālis piļs i c. Tuoļuok beja aizdavumi par viesturi – myusu tautai nūzeimeigim nūtykumim. Aizdavumā “Tradicejis” izmontuojom viesturis i literaturys stuņdēs, skūlys pasuokumūs īvuiceitū par senlatvīšu godskuortu svineibom. Komandom labi lūbēs vaicuojumi par Latvejis geografeju, taipat par literaturu. Aizdavumā “Personeibys” pīminējom zynomu cylvāku vuordus i jūs pīnasumu Latvejai. Aizdavumā „Muzyka” skanēja dzīšmu fragmenti, bet mums beja juopasoka dzīsmis nūsaukums voi izpiļdeituojs. Beja vaicuojumi ari par nūtykumim sportā, izcyluokajim sportistim i sporta veidim, kurūs jī givuši panuokumus. Skūlys muzejā ir apsaverami dorbareiki, sadzeivis prīškmati, kuri kolpuojuši myusu vacmameņom i vacvacmamom, vactāvim i vacvactāvim. Mysu aizdavums beja tūs atpazeit i pastuostēt par jūs pīlītuojumu.

Komandys beja veiduotys nu vysaidu klašu skūlānim, tūs dalinīki ruodeja sovus sagatavuotūs prīšknasumus – skaiteja dzejūļus, spēlēja klavīris, stuosteja anekdotus voi īsajuta popularu muzykantu i jūs grupu tālūs.

Konkursa nūslāgumā, cikom žureja izvērtēja myusu dorbu, par sevi sprīdem ari poši. Komandys vīna ūtru paslavēja, vīna ūtrai kū papraseja voi pīduovuoja. Nu treis apgolvuojumu kotrys izalasejom vīnu, kurs vysprecizuok raksturuoja myusu darbuošonūs konkursā: 1) dorbs maņ saguoduoja gryuteibys, 2) saprotu sovus pīnuokumus komandā i īsaklauseju cytu komandys dalinīku dūmuos, 3) aktivi sasadorbuoju ar komandys dalinīkim i jutūs atbiļdeigs par komandys dorba rezultatu. Prīcej, ka vairums nu myusu pozitivi varēja atsasaukt teiši iz trešū vaicuojumu. Itys konkurss beja loba īspieja puorbaudeit sovys zynuošonys , īsavuiceit kū jaunu i breineigi pavadeit laiku.