Kab Latvejis symtgadis jubileja godā dūtu sovu īguļdejumu folklorys montuojuma populariziešonā, AS “Sadalis teikls” kolektivs īsasaista “Symtgadis burtnīku” akcejā i nu 2018. goda febraļa da novembram digitalajā platformā lv100.garamantas.lv atšifrēs rūkrokstā asūšūs folklorys manuskriptus, ziņoj uzjāmums. AS “Sadalis teikls” kolektivā ir vaira nakai 2 000 darbinīku, kurejī ir aicynuoti byut par projekta dalinīkim i viestinīkim. Apmāram pīktuo daļa aba 400 darbinīku struodoj taišni Latgolys regionā, i jī seviški ir aicynuoti puorraksteit latgaliskūs manuskriptus.

AS “Sadalis teikls” ir pyrmais uzjāmums, kurais, guodojūt par kulturys montuojuma saglobuošonu nuokušajom paaudzem, projekta “Symtgadis burtnīki” autorim – Latvejis Universitatis Literaturys, folklorys i muokslys instituta Latvīšu folklorys kruotyvei – ir izruodejs itaidu iniciativu. Vaļsts symtgadis jubileja godā AS “Sadalis teikls” kolektivs – kai uzjāmuma darbinīki, tai i jūs saimis lūcekli – sovā breivajā laikā projekta “Symtgadis burtnīki” digitalajā platformā lv100.garamantas.lv atšifrēs folklorys kolekcejis rūkrokstā asūšūs manuskriptus i vadynuos projektā pīsadaleit ari cytus uzjāmumus.

AS “Sadalis teikls” vaļdis prīkšsādātuoja Baiba Priedīte soka: “Latvīšu folklorys manuskriptu puorraksteišona – tei ir uzjāmuma komandys vareiba duovynuot Latvejai sovu breivū laiku, dūt nūzeimeigu īguļdejumu folklorys montuojuma saglobuošonā, i tymā pošā šaļtī styprynuot komandys goru pēc nūzeimeigom puormaiņom uzjāmuma darbeibā. Uzjāmuma darbinīkim itei byus vareiba pakavēt breivū laiku, īpazeistūt i boguotynojūt sovys zynuošonys par myusu folkloru, nūvodu īdzeivuotuoju vierteibom i dzeivisveidu, kai ari itaidam breivpruoteigam dorbam īdvasmuot cytys kolegys i sūpluok asūšūs cylvākus.”

Projektā „Symtgadis burtnīki” sevkurs var īsajust Krišjāņa Barona lūmā i paleidzēt puorraksteit vaira nakai 187 000 digitalizātu puslopu ar Latvīšu folklorys kruotyvē globuotajim folklorys materialim – meiklem, nūstuostim, tautysdzīsmem, ticiejumim i cytim folklorys žanrim na tikai latgalīšu, bet ari latvīšu literarajā volūdā, līvu, krīvu, lītuvīšu, pūļu i cytuos volūduos, kurejuos viesturiski tyka lītuotys Latvejis teritorijā.

Karteņa: garamantas.lv