Iz sasatikšonu Rēzeknē aicynoj Īrejā dzeivojūšuo latgalīšu dzejneica Ingrīda Tārauda. Decembrī izguoja juos catūrtais dzejūļu kruojums “Pērlītes zem kājām/Bisers zam kuoju”, tymā apkūpuoti dzejūli latgalīšu i latvīšu literarajā volūdā.

Sasatikšona ar dzejneicu nūtiks 20. martā 14.00 stuņdēs Latgolys Kulturviesturis muzejā (Rēzekne).

Ingrīda Tārauda stuosta, ka gruomotys nūsaukums bejs izdūmuots jau godus desmit, bet tam “apakšā” asūšī dzejūli tyka īprīkšejā kruojumā “Boltais šokolads” (2012), bet daži – par biseri – beja aizagivuši nikur napublicāti i pyrma pīcu godu suoce apaugt ar cytim dzejūlim, cikom beigbeiguos “Bisers..” tyka da logiska iznuokuma. “Dūmoju, ka sovu stilu laika gaitā i sovu “ingridismu” naasu pagaisynuojuse, par tū, saprūtams, sprīss skaiteituojs,” soka Ingrīda.

“Gruomotys izdūšonys ceļš nabeja vīgls – sponsori, konkursi i tamleidzeigai, vyss beidzēs dreižuok kai izdūmuoju, bet gruomotai beja juoizīt taišni itymā laikā, kab paspātu pasaceit paļdis munim vystyvuokajim – eipaši munai pyrmajai vyslaiku kritikei – mamai. Jei sagaideja itū gruomateņu!” par gruomotys izdūšonu atkluoj autore.

Dzejūli nu I. Tāraudys jaunuokuo dzejis kruojuma “Pērlītes zem kājām/Bisers zam kuoju”.

***
tu navaicoj manis kur pazuda
pādejais spaits
aiz tuo zora i smylgu daņčūs
tevi mīļuoju puori sirds lylumam
puori laikam i nūlikteibai
niule cytus ceļus īsim
i dzaltonys pārkiunis pārkiuņuos
tai vajag

***
..rudiņa nūkruosu pylnys
leita lasis
leist leist leist
aiz mašynys lūgu
gleznu reprodukcejis
kolnu viersyuņu i da i na
kuopt pa i nu

**
muokuli daradynuoti
kai pyukalaini luoceiši
aiz manis

tyvuok tyvuok
zamuok zamuok
bolti bolti
ar palāku traipu pa vydu

dasaucu tevi breinumus
vērtīs
pajimt dalnuos i sapyust elpā
iz vysu pušu

nikas tovuos skrūpstuos
nanūtreis

Vaira dzejūļu rokstā “DZEJA. Tāraudu Ingrida: “..ka var byut i tai””.