Kas ir stereotipi? Kaidi stereotipi sastūpami par Latgolu i latgalīšim? Cik jī ir patīsi i voi var meklēt jūs aizsuokumus viesturē? Raidejums “Ka acs naradz, mute narunoj” rauga saprast, kai latgalīšus i Latgolu radz apleicejī i kai mes poši radzam sevi.

“Pīcu raidejumu cyklā sasatiks zynuotnīki, sabīdreibā atpazeistami i na tik atpazeistami cylvāki, kab ar sovu redzīni mudynuotu dūmuot par pamatvaicuojumim: nu kurīnis mes asam, kas eisti mes asam i kū mes gribim nu ituo laika atstuot nuokameibai?” soka raidejuma vadeituoja žurnaliste Evika Muizniece. Jai raidejuma vadeišonā pīsavīnuojs muzikis Ēriks Zeps.

Pyrmajā raidejumā “Ka acs naradz, mute narunoj” varēja puorsalīcynuot, ka, nasaverūt iz informaceju tehnologeju laikmatu, stereotipi jūprūjom dzeivoj cylvāku apziņā. Raidejuma veiduotuoji gasteja Reigys “mozajā Latgolā” – “Ausmeņa kebabā”, kura saiminīks stuosteja sovu stuostu par “izasisšonu” Reigā. Raidejums dazynuoja, kū zeimoj vuordi čiuļs, čangaļs, latgaļs i latgalīts.

Ūtrajā raidejumā tuo veiduotuoji pieteja, kur i kai latgali pasaruoda viesturē, kaids ir bejs jūs raksturuojums, i cik lelā mārā tys puorsasvīds iz myusu dīnu aktualūs stereotipu. Eksperti rauga skaidruot, kaidi beja i kai sevi apsazynuoja latgalīši, suocūt nu pyrmajim jū pīminiejumim hronikuos leidz pat K. Ulmaņa apvārsumam, par raidejuma saturu stuosta E. Muizniece.